La psichiatria d'uffants e giuvenils dal Grischun ha tant da far sco anc mai. Quai di il schefpsicolog Reto Mischol. En temps normals quintan els che circa 20% dals uffants e giuvenils dovran insacura sustegn psicologic. Uss èsi radund 30%.
Uffants e giuvenils n'èn betg tuttina
Uffants e giuvenils na pon ins dentant betg metter en la medema stgadella. Tar uffants èsi tenor Reto Mischol uschia ch'i va per ordinari bain cun els, sch'i va bain cun la famiglia. Sche bab e mamma vegnan perina, n'han nagins problems finanzials u d'existenza ed han bun in cun l'auter, lura vai per ordinari er bain cun ils uffants, cunquai ch'els èn fitg dependents da la situaziun famigliara.
Uschè ditg ch'i va bain cun bab e mamma lura è bler en urden per il mund dals uffants.
Auter èsi tar giuvenils, els han dapli contacts er ordaifer la famiglia, ch'èn fitg impurtants. E quels mancan uss savens: Els na pon betg ir en sortida ed ils contacts cun amias ed amis èn restrenschids. Tut quai po avair in'influenza sin ils giuvenils.
Contacts socials durant la giuventetgna èn qua per trenar ed emprender cumpetenzas socialas.
I po esser ch'els sa retiran e ch'ils geniturs na chattan betg pli in access tar els e tschertgan perquai agid. Da tschertgar agid baud avunda saja perquai impurtant. Cunzunt er sch'ils giuvenils u uffants han gia avant la pandemia gì problems.