Legenda: Glion RTRGlion
Ils votants e las votantas dad Ilanz/Glion han reelegì Carmelia Maissen da Castrisch (AdC) sco presidenta communala. Ella è vegnida reelegida cun 81% da las vuschs. Per la suprastanza èn vegnids elegids Martin Capeder da Duvin (senza partida), Alice Bertogg-Darms da Sevgein (AdC), Hanspeter Bundi da Castrisch (PLD) e Caroline Gasser Curschellas da Glion (AdC).
Legenda: Breil RTRBreil
La vischnanca da Breil ha elegì per l'emprima giada suenter la fusiun ses gremis communals: Clau Schlosser resta per in'ulteriura perioda d'uffizi president communal. El è vegnì reelegì cun 85% da las vuschs. La suprastanza cumpletteschan Roman Cathomas da Breil, Heini Hunger da Vuorz, Maurus Tomaschett da Breil e Middea Maria Luisa dad Andiast.
Legenda: Medel RTRMedel
Claudio Simonet è il nov president communal da Medel. El è vegnì elegì cun 158 vuschs da 193 vuschs valaivlas. Simonet è gia dal 2004 fin il 2010 stà en questa funcziun. La suprastanza cumpletteschan Gabriel Venzin e da nov er Werner Venzin. Sco suppleant è vegnì elegì Lucas Venzin. – Ils da Medel han gì da remplazzar dus posts vacants en vischnanca. Rico Tuor è sa retratg sco president communal, e Tabea Baumgartner sco suprastanta.
Legenda: Arosa RTRArosa
Votantas e votants d'Arosa han refusà la lescha communala davart abitaziuns secundaras – quai cun bun 54% da las vuschs. La secziun Arosa da HotellerieSuisse Grischun aveva fatg il referendum. La critica: La taxa directiva, fiss stada valaivla cun la lescha en pli paucs cas e fiss stada pli bassa ch’enfin uss. – Arosa ha ina quota d'abitaziuns secundaras da passa 20% e perquai vuleva la vischnanca adattar sias perscripziuns communalas al dretg surordinà. Las entradas da la taxa directiva duvrass la vischnanca d’Arosa per projects turistics ed era per investiziuns relevantas.
Legenda: Vaz RTRVaz
La vischnanca da Vaz ha approvà la nova lescha turistica – quai cun ina pitschna maioritad da 51%. – Las vischnancas da Churwalden, Lantsch e Vaz han elavurà ensemen ina nova lescha turistica per tuttas trais vischnancas. Cun in quint pauschal vegnan tenor il cussegl da vischnanca da Vaz tals e talas remunerads, ch'affittan lur immobiglias cun success – perquai che la pauschala è independenta da l'occupaziun effectiva. Gia approvà la lescha ha Lantsch, Churwalden ha renvià ella.
Legenda: Flem RTRFlem
A Flem han votants e votantas gì da decider ina giada dapli per Cassons, resp. per l'alternativa a quella per vegnir sin il culm. Ils da Flem han approvà cleramain l'adattaziun da la planisaziun locala – quai cun ina maioritad dad 87%. Quella midada è necessaria per survegnir il consentiment da la Confederaziun a la nova colliaziun cun pendicularas sin ils Cugns. Il project custa total 80 milliuns francs. Il matg 2019 avev’il suveran da Flem approvà ina contribuziun communala da 20 milliuns francs. – En ina segunda votaziun communala èsi ì per la fracziun da Fidaz: Ils da Flem han er qua ditg cun 87% Gea a la revisiun parziala da la planisaziun locala. I va qua per che l’auto da posta possia manevrar meglier e per remplazzar la staziun a val da la pendiculara da latg. – E cun 84% han ils da Flem approvà en la terza votaziun la lescha da taglia pli survesaivla e pli schlanca. Per las tariffas da taglia na sa mida dentant nagut.
Legenda: Lumnezia RTRLumnezia
Renzo Blumenthal è il nov suprastant da la vischnanca Lumnezia. El è vegnì elegì cun 236 vuschs. Tar questa elecziun han dentant er 316 votants e votantas mess en in cedel nunvalaivel u vid.
Legenda: San Murezzan RTRSan Murezzan
Ils votants e las votantas da San Murezzan han approvà cun ina maioritad da stgars 85% la revisiun parziala da la planisaziun locala. Quella duai levgiar als proprietaris da terren da bajegiar, da nizzegiar quel terren. Las novaziuns permettan en ils blers cas ina distanza pli pitschna envers las auas – che prevesì en il plan da zonas. La revisiun ha da succeder, perquai che la lescha federala ha midà.
Legenda: Cuira RTRCuira
Ils da Cuira han decis davart duas dumondas da credit: Cun ina maioritad dad 83% han ils votants e las votantas approvà la cumpra da l’areal da la halla da la citad per 7,65 milliuns francs. Uschia survegnan las pendicularas da Brambrüesch il spazi necessari per bajegiar la nova staziun a val. Persuenter è planisada ina nova halla per fieras ed events a l’Obere Au. – Medemamain ditg Gea han ils da Cuira al credit dad 88,8 milliuns francs per ina nova scola ed indrizs da sport a la Ringstrasse, quai cun 84% da las vuschs. La nova scola duai remplazzar las chasas da scola Daleu e Florentini.
Legenda: Claustra-Serneus RTRClaustra
Votantas e votants da la vischnanca da Claustra han decis davart fatgs da la scola: Il suveran da Claustra ha refusà l'iniziativa dal pievel «Serrar scolas davant il pievel, impuls general per ina votaziun» cun stgars 52%. Medemamain refusà han ils da Claustra er l’iniziativa «Serrar scolas davant il pievel, impuls general per la tscherna dal lieu» – quai cun stgars 53%. Il punct da partenza èn stadas ponderaziuns davart ils singuls lieus da scola e la proposta da serrar la scola primara en la fracziun Saas. Il cussegl communal da Claustra aveva proponì da refusar omaduas iniziativas.
Legenda: Tavau RTRTavau
A Tavau vai en tut per reveder pliras planisaziuns localas: En il territori da skis Parsenn po la pista fin giu la val (a Tavau Vitg) vegnir ennavada cumplainamain en il territori da Palüda. 82% dals votants e las votantas han approvà la revisiun parziala da la planisaziun locala correspundenta. Per realisar il project dovri in schlargiament da l’indriz da far naiv. Vitiers duai la lingia da la pista vegnir optimada en in lieu. – 85% dals da Tavau han ditg Gea a la revisiun parziala da la planisaziun locala tar il Center Guggerbach. La fundaziun Center Guggerbach Tavau, che maina il center d'attempads, po uschia engrondir la purschida. Cun midar la planisaziun locala vegnan ils bajetgs planisads en la medema zona sco tut ils ulteriurs bajetgs dal center. – Ed er areguard la planisaziun locala a Gadastatt han ils votants e las votantas approvà duas revisiuns parzialas. Quellas pussibiliteschan il diever futur da duas parcellas.
Legenda: Schiers RTRSchiers
Ils da Schiers han ditg Gea ad in credit dad 810'000 francs per construir in parcadi a Sunnabündti – quai cun ina maioritad da 62%. Previs èn 16 parcadis sutterrans e 13 parcadis a la surfatscha (sin la parzella che s'auda a la vischnanca). Plinavant ha il suveran gì da decider, sche la vischnanca duai vender ils singuls parcadis ubain dar a fit quels. 66% dals votants e las votantas èn s'exprimids per la varianta da dar a fit. La varianta da vender ils parcadis è vegnida refusada cleramain.
Legenda: Samignun RTRSamignun
L'auto da pumpiers da Samignun survegn ina stgala girabla, il suveran da Samignun ha approvà cun stgars 63% da las vuschs in credit correspundent da 500'000 francs. – Plinavant han ils votants e las votantas approvà cun 64% da las vuschs barats da terren per segirar la pista a val da l'Alp Trida / Alp Bella giu Laret. – Ed il suveran da Samignun ha approvà la cunvegna da prestaziun cun il Center da sandà Engiadina Bassa – quai cun 67% da las vuschs.
Legenda: Regiun Viamala RTRRegiun Viamala
La Regiun Viamala survegn novs statuts: Tut las vischnancas da la regiun han approvà cun clera maioritad la revisiun parziala dals statuts. La vischnanca cun la blera populaziun, actualmain è quai Tusaun, survegn uschia il dretg sin in sez en la cumissiun regiunala. Vitiers resguardan ils statuts revedids las fusiuns da vischnancas dals davos onns. Las vischnancas che fan part da la Regiun Viamala èn: Andeer, Avras, Cazas, Tumleastga, Farera, Flearda, Farschno, Masagn, Muntogna da Schons, Valragn, Runtgaglia, Rothenbrunnen, Scharans, Seglias, Sufers, Tusaun, Tschappina, Urmagn, Ziràn-Reschen.
Resultats dals 13-06-2021 Tge che las vischnancas grischunas han decis
Qua chattais ina selecziun da resultats da votaziuns ed elecziuns sin nivel communal. La survista vegn adina puspè actualisada cun ils resultats.
Parter
RTR votaziuns 2021
Parter