Il chantun ha prendì posiziun en chaussa nova concessiun per la societad svizra da radio e televisiun SSR SRG. Da valitar a moda positiva saja en spezial, che la SSR SRG vegnia obligada da dar dapli pais al barat tranter las regiuns linguisticas. Plinavant sustegnia la regenza il fatg, che dapli purschidas duain vegnir concepidas er per gruppas giuvnas da la populaziun. Quai scriva la regenza en ina communicaziun a las medias.
Ultra da quai dat la regenza in'attenziun speziala a l'idea da stritgar in dals dus programs da televisiun da la regiun linguistica taliana. Ella pretenda ch'i stoppia en mintga cas esser garantì da retschaiver ina purschida multimediala correspundenta en tut las parts da la regiun linguistica taliana.
Consultaziun da la Confederaziun
La nova concessiun prevesa che las pretensiuns envers il service public da la SSR SRG vegnian augmentadas e precisadas. Il sboz da la concessiun prescriva tranter auter che almain 50 pertschient da las entradas da taxas duain vegnir impundidas per l'infurmaziun.
RR novitads 10:00