Gia avant sis onns era ina maridaglia stada en discussiun. Lezza giada avevan la PBD dal Grischun e la PBD da Berna ditg na – ils chantuns da tschep da la PBD. Uss saja quai auter, di Beno Niggli, il president da partida.
L’acceptanza d’ina maridaglia saja dapertut guliva – era tar ils commembers grischuns e bernais. Ils commembers da quels dus chantuns hajan participà numerusamain a la retschertga.
I savess ir en direcziun d'ina nova partida dal center
La retschertga haja mussà ch’ils commembers giavischian ina nova partida cun nov num. Sche la PCD salvass il num, lura midassan ils commembers da la PBD simplamain tar la PCD, di Beno Niggli. Quai fiss ina tut autra situaziun da partenza. Ils commembers s’exprimien cleramain per la schanza da cumenzar da nov.
È la PCD pronta da desister da ses num?
Uss è la PCD en roda. La partida cun il «c» en ses num n’ha anc betg terminà la retschertga tar ses commembers. I saja anc avert, tge che sia partida saja pronta da dar si per ina nova partida, di Stefan Engler, president da la PCD grischuna.
Sin livel naziunal lavurian las duas partidas bain ensemen. Ellas hajan gudagnà forza cun furmar ina fracziun communabla. Ma las partidas chantunalas possedian atgnas structuras ch’ins na dastgia betg periclitar.
Jau faschess vess da dar si ina istorgia da partida da passa 120 onns
