Siglir tar il cuntegn

Header

Navigaziun

Purtret dal Cussegl grond a Cuira.
Legenda: La revisiun da la lescha da taglia è sut tetg. Keystone
cuntegn

Chantun Revisiun da la lescha da taglia è sut tetg

Ch'i dovra la midada da la taglia sin relasch tar la taglia sin la part d'ierta n'è betg stà dispitaivel. Tuttina han differents puncts da la revisiun dà da discutar. La finala è la revisiun parziala da la lescha da taglia vegnida approvada cun 95:19 vuschs tar in'abstenziun.

Il punct central da la lescha è stà la midada dad la taglia sin relasch tar la taglia sin la part d’ierta. Vul dir en il futur vegn il relasch repartì e mintga ertavel ha lura da pajar singul. Discussiuns hai tranter auter dà tar la dumonda tgi che sto en il futur pajar quant blera taglia sin l’ierta. En il futur na ston geniturs e partenaris da concubinat betg pli pajar taglia. Sper quai sto er il tschep dals geniturs mo pli pajar 10% enstagl da 5% taglia sin l'ierta.

Discussiuns hai per exempel er dà tar la dumonda da las tariffas da las vischnancas. Ulteriurs artavels, pia betg da la famiglia, pajavan enfin uss 25% taglia sin l'ierta. E quai resta uss er uschia. Malgrà che la regenza vuleva sbassar quella tariffa be sin 20% per esser sin il medem livel sco tar il chantun. L'autonomia da las vischnancas ha a la fin dentant fatg la cursa uschia ch'i resta tar ils 25%.

Grondas discussiuns davart tgi che duai pajar quant

Suenter l'emprim mez di da la sessiun è la gronda part da la revisiun parziala da la lescha da taglia gia vegnida discutada. Da principi eran tuts d'accord ch'i dovria ina revisiun e la midada da la taglia sin relasch tar la taglia sin la part d'ierta. Tuttina han divers puncts dà da discutar. Tranter auter er ina proposta da la fracziun da la PLD. Ella vuleva numnadamain che betg mo uffants e consorts vegnan deliberads da la taglia d'ierta, mabain er il tschep dals geniturs. Tar quel tutgan per exempel fragliuns, nevs e nezzas.

La regenza e la cumissiun vulevan bain er sbassar la taglia da 10% sin 5%. Quai na va dentant betg lunsch avunda a la PLD. Ella vuleva deliberar il tschep dals geniturs dal tut. I ha dentant dà gronda opposiziun ed il Cussegl grond è sa decidì cun 72 tar 45 vuschs per la varianta da regenza e cumissiun. La raschun per l'opposiziun era cunzunt ch'il chantun avess anc ina giada pers radund 6 milliuns francs cun deliberar il tschep dals geniturs dal tut.

La revisiun da la lescha duai dentant pir ir en vigur il cumenzament dal 2021 e na betg sco previs il 2020.

Puncts centrals da la lescha

En il center da la sessiun stat la revisiun parziala da la lescha da taglias e vischnancas. Insaquantas midadas planisadas:

  • Midada da la taglia sin relasch (Nachlasssteuer) tar la taglia sin la part d'ierta (Erbanfallsteuer)
  • Las vischnancas salvan suveranitad da taglia e pon vinavant incassar taglia
  • Sper consorts ed uffants vegnan er ils geniturs e partenaris da concubinat deliberads da la taglia
  • Per il tschep da geniturs (fragliuns, nevs, nezzas, euv.) duai i dar da nov ina tariffa da taglia reducida da 5% tar il chantun. Tar las vischnancas resta el tar maximal 5%
  • Tar ils ulteriurs artavels duai la tariffa da taglia vegnir auzada tar il chantun da 10% sin 15%. Tar las vischnancas duai la tariffa vegnir sbassada dad uss maximal 25% sin 20%

Cun quellas midadas quinta il chantun cun radund 4,2 milliuns francs pli pauc entradas. Er tar las vischnancas po quai tut tenor tariffa esser che singulas prendan en pli pauc. En general quinta il chantun dentant cun lev pli autas entradas tar las vischnancas.

Pled d'avertura

La presidenta dal Cussegl Grond Tina Gartmann-Albin ha avert la sessiun dal Cussegl Grond da favrer cun far in appel da far sport d’enviern. Betg be ils turists duain far diever da las infrastructuras da sport, mabain er ils indigens. Investir en ina buna infrastructura d’enviern ecologica saja numnadamain betg be economicamain impurtant per il chantun Grischun, mabain saja er ina investiziun en la prevenziun da sanadad.

Bleras dumondas ed incumbensas

Vinavant ha il Cussegl Grond ina retscha moziuns sin la glista da tractandas. Per exempel duai la regenza respunder la dumonda dal deputà da la PPS Roman Hug, schebain la sminuziun da las entradas en il museum d'art a Cuira haja da far cun ils problems dal museum dals ultims onns.

RR actualitad 12:00