Siglir tar il cuntegn

Header

cuntegn

Chantun Richard Cavigelli è mort

La notg dals 3 sin ils 4 da november è l'anteriur schefredactur da Radio Rumantsch mort cun 74 onns.

Richard Cavigelli è creschì si en ina famiglia da purs a Siat, ensemen cun 9 soras e frars. Gia en sia uffanza era quai normal da sa gidar e surpigliar responsabladad en tuttas domenas da lavur. E sco giuven aveva era Richard Cavigelli stuì ir en plazza da stad.

Scolast primar, secundar, organist e dirigent

Oriundamain è Richard Cavigelli stà scolast. Suenter il seminari da scolasts a Cuira aveva el dà trais onns scola primara a Curaglia. Lura ha el absolvì il studi da scolast secundar a l'Universitad da Friburg. Avant che vegnir a dar scola a Glion ha el dà in onn scola a Müstair. 14 onns ha el dà scola a la scola superiura da Glion.

Durant quest temp aveva Richard collavurà per l'ediziun da meds d'instrucziun. El ha era dirigì la Societad da musica da Medel. Cun cumenzar sco schurnalist ha el lura chalà da diriger. Cun sia dunna Silvia Lutz ha el gì duas figlias. Sco giuven scolast ha el sunà l'orgla e dirigì il chor viril.

In Rumantsch passiunà

Cura ch'el aveva cumenzà sco redactur tar il Radio Rumantsch saja el stà predestinà da surpigliar, tranter auter la redacziun da Radioscola. El haja tgirà quella enfin ch'il servetsch è crudà dal tuttafatg or dal program, di Christian Joos l'anteriur collega da lavur da Richard Cavigelli.

A Richard saja la qualitad da la lingua stda fitg a cor. El saja stà conscient ch'il radio e la televisiun sajan vehichels zunt impurtants per intermediar in bun rumantsch. El saja stà per ils collegas ina da las autoritads linguisticas en chasa. El tadlava er suenter la pensiun cun ureglia critica la lingua applitgada da l'emettur da RTR.

Durant 22 onns ha Richard Cavigelli lavurà per RTR, e quai sco redactur da radio en las pli differentas funcziuns:

  • 1983 - 1989 redactur infurmaziun Radio Rumantsch ed emprim correspundent RTR en Chasa federala a Berna
  • 1989 - 1994 schefredactur Radio Rumantsch
  • 1994 - 2003 coordinatur redacziun infurmaziun Radio Rumantsch
  • 2003 - 2005 redactur regiunal Radio Rumantsch a Glion

Questas midadas da funcziun ed incumbensa sajan lura era stadas la gronda fascinaziun da questa clamada, sco quai che La Quotidiana di en in artitgel deditgà a Richard Cavigelli cura ch'el è ì en pensiun. L'artitgel dal 2006 di vinavant ch'el haja ditg che questas funcziuns hajan sfurzà el da restar flexibel e da s'adattar. Quai saja mintgamai stà ina gronda sfida.

En pensiun turnà tar la musica

Ils onns da la pensiun saja Richard Cavigelli sa deditgà pli fitg a la musica cun sunar l'orgla en baselgia a Siat. Avant onns avevan el e sia dunna Silvia Lutz cumprà ina chasa veglia a Siat e sajan perquai anc savens stads quasi, di Joos. Sin dumonda fascheva el era translaziuns u correcturas da texts rumantschs, per exempel per il Museum regiunal Surselva.

Tgi che haja enconuschì Richard Cavigelli haja fatg persenn ch'el saja stà ina persuna onesta, discreta, lavurusa, senza metter insacura sasez en il center u mussar impurtanza.

RR novitads 18:00

Artitgels legids il pli savens