Siglir tar il cuntegn

Header

Video
Gronda participaziun a la rimnada d'armas organisada da la Polizia chantunala
Or da Telesguard dals 11.11.2019.
laschar ir
cuntegn

Rimnada da Polizia chantunala 190 armas pli pauc en il Grischun

Returnar carabina, buis d'assagl u veglia buis da chatscha – per ils blers è la deponida da l'arma in burdi pli pauc.

Atgnamain èsi sur onn pussaivel da returnar gratuitamain armas. Per far attent la populaziun organisescha la polizia dentant en in turnus da trais onns in di d'acziun, uschia puspè la sonda passada. Tar tut ils posts da la polizia chantunala en il chantun han ins la fin d'emna pudì dar giu armas e muniziun.

Registrar, plunar, manizzar

Schegea che bleras armas n'èn betg stadas registradas avant en las actas da la polizia, vegnan tut las armas che vegnan deponidas registradas en il sistem (num da possessur, tip d'arma ed il numer specific). L'anteriur possessur da l'arma survegn alura tschentà ina decleraziun da renunzia.

Las bleras armas che vegnan surdadas funcziunassan anc dal tuttafatg.
Autur: René Schuhmacherpledader da medias Polizia chantunala

Malgrà che las armas èn anc en funcziun, vegnan tuttas plunadas e tenor obligaziun da la polizia silsuenter dismessas. Sut surveglianza vegnan ellas manizzadas en in'ovra en la regiun.

«In burdi pli pauc»

Ils blers ch'han prendì la chaschun da deponer l'arma sin il post da la Polizia chantunala a Cuira eran umens pli vegls. Per gronda part han els surdà l'arma cun la quala els han fatg il servetsch militar avant decennis:

Ins na sto betg pli far quitads cura ch'i vegn ozendi er rut en dapertut.
Autur: Toni Goodchauffeur d'autos da posta pensiunà
Uss è quella arma stada 15 onns sin il surchombras – uras da dismetter.
Autur: Marcus Andreolipedel da chasa da scola

Betg mo tocs exclusiv da l'armada, ma era intginas armas da chatscha èn sa plunadas a Cuira:

Cun quella arma sun jau stà bunamain 40 onns a chatscha. Gea, cun quella arma colliel jau fitg bleras regurdientschas.
Autur: Jörg Schlegelchatschader e policist pensiunà

«Buna participaziun»

Sco gia tar il davos di d'acziun il 2016, cura che 195 persunas avevan purtà 311 armas sin ils posts da polizia, han era questa giada bain insaquants fatg diever da l'occasiun. Tut en tut han 167 persunas surdà 190 armas sin tut ils posts da la Polizia chantunala en il Grischun.

Tge armas èn vegnidas dadas enavos?

Personen-Box aufklappenPersonen-Box zuklappen
  • 112 armas d'ordonanza (carabinas e buis d'assagl)
  • 49 armas da chatscha e da sport
  • 14 armas da fieu curtas
  • 12 armas da stilettar sco p.ex. baionettas
  • 3 armas d'aria cumprimida

Schegea che quai èn passa 100 armas pli pauc che la davosa giada, discurra la Polizia chantunala d'ina buna participaziun. Uschia vegnia il 2022 tgunsch puspè a dar in di da rimnada.

RR novitads 16:00