Sco ch'il directur dal Circus Royal, Oliver Skreinig, ha declerà a RTR, sajan els gia stads pli ditg en discurs cun il Circus Nock ed hajan offrì da surpigliar la turnea tras il Grischun. Per cas ch'il Nock pudess turnar, dessan els puspè giu questa turnea.
Il directur Skreinig è dentant da l'avis ch'i saja impurtant da purtar il divertiment dal circus en tut la Svizra – e cun quai er en las muntognas grischunas. Sch'il Nock na turna betg pli, haja el en senn da surpigliar er a lunga vista la turnea tras il Grischun.
Turnea dal Circus Royal
| Data | Lieu |
| 05.07. – 07.07.2019 | Cuira – Obere Au |
| 09.07. – 10.07.2019 | Küblis – Plazza da martgà |
| 12.07. – 14.07.2019 | Claustra – Parcadi da la viafier veglia |
| 16.07. – 18.07.2019 | Scuol – Pendicularas Motta Naluns |
| 20.07. – 24.07.2019 | Silvaplana – Plazza da circus |
| 27.07. – 07.08.2019 | Samedan – Cho d'Punt |
| 09.08. – 11.08.2019 | Zernez – Chastè Wildenberg |
Per l'emprima producziun n'hai betg tanschì
L'emprima producziun ch'è stada planisada il venderdi suentermezdi a las 15:00 è vegnida stritgada. Raschun è ch'il circus haja da cumbatter cun memia pauc persunal per montar las tendas.
Sco Oliver Skreinig ha declerà, saja quai ina da las grondas sfidas per ils circus en general. Vitiers vegnia ch'i haja er anc dà problems tar il transport. Per la producziun da la saira a las 20:00 duess lura dentant tut esser pront.
Il Circus Royal datti dapi 56 onns. El è vegnì fundà il 1963 da Ludwig Gasser e sia dunna Helen Gasser-Stey. Pli tard ha lura il biadi Bruno Gasser surpiglià il timun. Sco ultim è il circus stà en ils mauns da Peter Gasser. El ha manà il segund grond circus svizzer per prest 20 onns, dal 1999 fin l'entschatta 2018. Dapi l'onn passà è Oliver Skreinig il directur dal circus, el è pia l'emprim che maina vinavant la dinastia che n'è betg direct da la famiglia Gasser.
Concurs dal Nock sco il grounding da la Swissair
Oliver Skreinig deplorescha fitg ch'il Circus Nock è ì concurs. Per la branscha da circus saja quai stà quasi sco il grounding da la Swissair. Il Circus Nock saja in'instituziun svizra cun ina talmain lunga istorgia e la consternaziun saja gronda che quest circus venerabel saja concurs:
Nock aveva 158 onns experientscha en Grischun
Ina gronda sfida per il Circus Royal vegn ad esser ch'il terren da questa stad è nunenconuschent. Il circus n'enconuscha betg las plazzas nua ch'i vegnan a producir ed er las vias sur ils pass n'èn anc betg enconuschentas al circus, ha declera Oliver Skreinig. Il Circus Nock haja gì qua in avantatg da 158 onns.
RR actualitad 17:00
