I va per 105'000 francs. La vischnanca da Samedan less parter quests custs restants da tgira cun las autras vischnancas da la regiun Malögia. Quatter vischnancas dian dentant da na.
Quests custs derivan da duas persunas ch’èn vegnidas il 2013 ed il 2015 en la chasa da tgira Promulins a Samedan. Las duas persunas attempadas derivavan dal chantun da Son Gagl e da Turitg. En il fratemp èn ellas mortas – ma ils custs da tgira occupeschan tuttina anc la suprastanza da Samedan.
Turitg e Son Gagl na ston betg pajar
La vischnanca è numnadamain ida avant dretgira ed ha pretendì che las vischnancas d’origin stoppian pajar ils custs. La dretgira administrativa grischuna ha dentant decis che lezzas na sajan – tenor la lescha vertenta da lez temp – betg obligadas da surpigliar quests custs. Samedan sco lieu da domicil stoppia pajar.
Suenter la decisiun da dretgira haja Samedan dumandà sche las autras vischnancas da la regiun Malögia gidian a purtar ils custs restants da tgira da questas duas persunas, di Gian Peter Niggli, president communal da Samedan. La finala tutgia la chasa da tgira Promulins gea a tut las indesch vischnancas da la regiun.
7 vischnancas pajan – 4 betg
La conferenza dals presidents da la regiun haja ditg gea, tuts sa participeschian. Ma cura che Samedan haja tramess ils quints, hajan Bever, San Murezzan, Silvaplauna e Puntraschigna tuttina ditg na. Las quatter vischnancas argumenteschian che la dretgira haja decis che Samedan stoppia pajar.
Gian Peter Niggli na chapescha betg questa tenuta. En la regiun Malögia partian ins solitariamain ils custs dad indrizs ed infrastructura sco per la plazza aviatica, il ospital, la scola da musica ed uschia vinavant.
Samedan paja er 1,5 milliuns per la destinaziun Engiadina San Murezzan e n’è betg ina vischnanca turistica
Perquai spetga il president da Samedan era solidaritad sch’i va per la chasa da tgira Promulins ed ils custs restants. Quai er perquai ch’i sa tracta d’in cas unic, che na po gnanc pli capitar. Il 2019 ha midà la lescha: Oz fissan las vischnancas d’origin dad ordaifer il chantun obligadas da surpigliar ils custs restants.