Siglir tar il cuntegn

Header

cuntegn

Sch'il virus turna Ospitals grischuns èn pronts per ina segunda unda

Tut ils ospitals dumandads n'èn mai vegnids al cunfin da las capacitads fin uss. Ed er sche tuts èn puspè turnads u bunamain turnads al manaschi usità, èn els pronts per il cas ch'i dat ina segunda unda dal coronavirus.

La Confederaziun prescriva numnadamain ch'ils chantuns stoppian garantir capacitads per il cas d'ina segunda unda dal virus. Uschia mantegnan ils ospitals partiziuns d'isolaziun u da tgira intensiva per esser pronts en il cas dals cas.

En l'Ospital chantunal a Cuira fissian els pronts da reagar ed er dad augmentar immediatamain las capacitads sche quai fiss necessari, uschia il pledader da medias Dajan Roman. Sch'i vess da dar ina segunda unda possian els plinavant er profitar da la lavur gia prestada. Uschia sajan tut ils concepts e lavurs organisatoricas gia avant maun. Ins giess uschia meglier preparà en la segunda unda che tar l'emprima, agiunta Dajan Roman.

Nus essan adina pronts e pudessan reagar ed augmentar las capacitads immediatamain en il cas ch'i dess ina segunda unda.
Autur: Dajan Romanpledader da medias da l'Ospital chantunal

Sumegliant sa preschenta la situaziun tar l'ospital a Tusaun. Tenor il directur Reto Keller na sajan ils 10 letgs per pazients da corona mai stads occupads tuts ensemen. Quels sajan però vinavant pronts. Ed er sch'i avess da dar dapli pazients en ina giada fissan els pronts. Lura stuessan els però puspè reducir il dumber d'autras operaziuns engaschar dapli persunal. Ma er quai fiss tenor il directur pussaivel entaifer curt temp.

«Nà da l'infrastructura fissan nus subito pronts, be il persunal stuessan nus clamar.» Quai di la directura da l'ospital regiunal da la Surselva a Glion, Claudia Käch. Actualmain hajan els reducì ils plazs per pazients da corona u cun suspect da corona d'ina staziun entira sin in mesa. Quai correspunda a ca. 6 letgs. A mantegnair or dal temp da l'emprima unda vegnian els ils curs da rinfrestgar las reglas per il persunal. Co ir enturn correctamain cun vestgadira, guants ed ulteriur material da protecziun, quai saja sa cumprovà, uschia Claudia Käch.

Igl ha adina gì plaz avunda. Per cletg e meglier uschia ch'il cuntrari pon ins dir. Da quai anora avessan nus anc dà damogn a bler dapli.
Autur: Beat MollCEO fundaziun Provediment da sanadad Engiadin'Ota

Malgrà che l'ospital da l'Engiadin'Ota a Samedan ha gì era plirs pazients da corona il medem temp n'èn er els mai vegnids als cunfins. Tenor il CEO Beat Moll avessan els anc pudì tgirar bler dapli pazients. Insumma na saja il plaz er tar ina segunda unda nagin tema tar els. Perquai ch'igl è stagiun bassa saja l'ospital uschè u uschia plitost vid. Tenor Beat Moll èn dus pucts impurtants per esser preparà: D'ina vart il persunal e da l'autra l'infrastructura. Installaziuns gia fatgas, sco p. ex. il post da controlla separà a l'entrada vegnian els a mantegnair era sch'els na dovrian betg ellas. Tar il persunal hajan els pudì laschar turnar la glieud ch'els avevan organisà dad auters ospitals u er persunas che han ina giada lavurà en la tgira. Tuts fissan però entaifer curt temp puspè disponibels sche necessari.

Pli u main puspè manaschi usità

Entant èn tut ils ospitals dumandads puspè turnads pli u main al manaschi usità. Sulettamain las capacitads prescrittas da la Confederaziun tegnan els liber. I na dettia er naginas restricziuns pli tar operaziuns e tractaments.

Turnar tar il manaschi usità duri però er ses temp, uschia il pledader da medias da l'Ospital chantunal, Dajan Roman. Gist er pervi da la planisaziun da persunal ch'ins haja er midà durant il temp critic da la pandemia. Perquai ed er pervi da las prescripziuns da la Confederaziun na sajan ins anc betg dal tut sin il nivel ch'ins haja uschiglio durant quest temp da l'onn.

A Glion hajan els pudì reparter bain las operaziuns spustadas sin las proximas emnas. Ils pazients hajan gì gronda chapientscha, uschia la directura Claudia Käch. Anc betg enavos tar la normalitad saja l'ospital tar tut las mesiras da protecziun: p. ex. las controllas e las mesiras d'igiena a l'entrada. Er sentian ins ferm cunzunt tar ils patients ch'i saja anc adina scumandà da far visitas en l'ospital.

RTR actualitad 07:00

Artitgels legids il pli savens

Scrollar a sanestra Scrollar a dretga