Siglir tar il cuntegn

Header

en ina baselgia vegn construì in skateparc
Legenda: La baselgia Santa Barbara en Spagna vegn bajegiada enturn. Reuters
cuntegn

Chantun Sch'ina baselgia daventa in skateparc

Far or d'ina baselgia ina cafetaria u in skateparc tuna in pau utopic. E tuttina datti da quests exempels en l'Italia, la Germania e la Frantscha. Ed era en Svizra datti adina pli savens plaivs che fan ponderaziuns co utilisar las baselgias, sch'ellas na vegnan betg pli duvradas.

Las plaivs grischunas, catolicas u refurmadas, han da sbatter tuttina sco las plaivs en la Bassa cun extradas, dischinteress e pauca glieud en baselgia. E sco en la Bassa sa tschenta plaunsieu era en plaivs grischunas la dumonda da nizzegiar las baselgias e chapluttas per intents betg sacrals.

Pront, dentant anc betg realisà

In exempel concret datti en l'Engiadina. Cun la fusiun da La Punt e Chamues-ch ha ina votaziun dal pievel decidì da nizzegiar la baselgia da La Punt per auters intents. Ideas concretas n’èn dentant anc betg sin maisa.

Protecziun n'è betg sacrosancta

Damai che las pli bleras baselgias e chapluttas en il Grischun èn sut la protecziun da monuments, n’èn las pussaivladads betg uschè grondas. Quai di Simon Berger, il tgirader da monuments chantunal. Ord lur vista saja in auter niz dentant betg exclus, els sajan interessads en l’emprima lingia vid la substanza dal bajetg.

Utilisaziun originala duess restar pussaivla

Ina ponderaziun betg nunimpurtanta saja dentant era da guardar, ch'ina baselgia cun auters intents pudess tut tenor era in di puspè vegnir duvrada sco baselgia, manegia il tgirader da monuments Simon Berger.

rtr/hs/ba