Schacal mellen da vesair en il museum da natira Grischun

A partir dal 1. da fanadur è il schacal mellen ch'era vegnì sajettà per sbagl en Surselva da vesair en il museum da natira dal Grischun a Cuira. Il schacal mellen – in animal che sumeglia fitg ina vulp.

Laschar ir video «Il schacal mellen – dal guaud en Surselva en il museum da la natira a Cuira»

Il schacal mellen – dal guaud en Surselva en il museum da la n...

2:04 min, Telesguard dals 1.7.2016

Il schacal mellen è sco il luf u la vulp in animal da rapina canin. El è per ordinari d'entupar en grondas parts da l'Africa dal Nord, en il Proxim Orient, sin il subcontinent indic fin en Tailanda.

Cumparegliar pon ins el cunzunt cun la vulp ch'è da chasa en Grischun. El è dentant in zic pli massiv ed ha chommas pli lungas. La colur da ses pail è in zic pli stgira che quella da la vulp. Il piz da la cua è tar il schacal nair, tar la vulp alv. Sias chommas èn dentant cleras, quellas da la vulp stgiras.

Schacal mellen è cunzun activ la notg

En emprima lingia è il schacal mellen en viadi la notg. Durant ina notg possia el senz'auter far in viadi da 20 kilometers, uschia Ueli Rehsteiner il directur dal museum da natira. Il schacal mangia en emprima lingia animals pitschens fin mesauns, insects e fritgs. El spretscha dentant er betg ruments e cadavers. Per umans n'è il schacal mellen insumma betg privlus.

Dapi radund 30 onns sa derasa el vers vest

Il schacal mellen extenda ses territori dapi onns da l'ost vers il vest. En l'Austria ed en il nordost da l'Italia sa reproducescha il schacal mellen dapi il 2007. Dapi il 2011 cumpara il schacal mellen mintgantan en traplas da fotografias en Svizra.

Schacal mellen è protegì

Pervi da sia immigraziun autonoma vala il schacal mellen sco spezia indigena protegida. Sch'il schacal mellen visitia la Svizra mo sin ses transit u sch'el vegn a sa domiciliar qua saja dentant avert, uschia Ueli Rehsteiner il directur dal museum da natira. Sco spazis da viver preferescha el rivas da flums cun chagliom e territoris vischins d'auas e palius.