Sco «duo» en il cumbat electoral

Il liberaldemocrat Martin Schmid ed il cristiandemocrat Stefan Engler fan in cumbat electoral cuminaivel. Dentant er sch'els èn enfin uss ils sulets candidats che candideschan per in'ulteriura perioda en il Cussegl dals chantuns, vulan els prender serius las elecziuns.

Ils Cussegliers dals chantuns Stefan Engler (PCD) e Martin Schmid (PLD) fan communablamain cumbat electoral. Bild in Lightbox öffnen.

Legenda da maletgs: Ils Cussegliers dals chantuns Stefan Engler (PCD) e Martin Schmid (PLD) fan communablamain cumbat electoral. Keystone

Els na vulan betg vegnir elegì mo perquai ch'els n'han enfin uss nagins cuntracandidats «Mabain sin fundament da nossa lavur che nus avain fatg durant ils davos 4 onns a Berna», di Martin Schmid. Per exempel hajan els gudagnà influenza en il Cussegl dals chantuns cun sa posiziunar en las cumissiuns.

Impurtantas cumissiuns per il Grischun

Martin Schmid è tranter auter en la cumissiun da gestiun ed en la cumissiun per ambient, planisaziun dal territori ed energia. Stefan Engler e tranter auter en la cumissiun da las instituziuns politicas ni en la cumissiun per dumondas giuridicas. Tuts dus èn er en la cumissiun per economia e taxas.

Quai sajan impurtantas cumissiuns per il chantun Grischun che haja da cumbatter cun las consequenzas da la iniziativa da las segundas abitaziuns, cun in turissem flaivel e cun plazzas da lavur periclitadas.

«Jau na less betg esser tar quels che sperdan»

Tema ch'i dess da la PPS anc ina terza candidatura per il Cussegl dals chantuns na han Engler e Schmid betg, dentant respect: «Adina sch'i ha dapli candidats che posts datti da quels che sperdan ed jau na less betg esser tar quels che sperdan, uschè ch'igl è da prender serius. Dentant èsi natiralmain legitim che mintga partida po er metter si candidats», di Stefan Engler.

Turnea cumenza

Durant ina pitschna turnea s'entaupa il duo burgais en differents lieus dal chantun cun la populaziun. Oz cumenza la tura a Glion. Lasuenter suonda Cuira, San. Murezzan, Tavau, Tusaun ed en la Mesolcina.