Per Sandra Locher Benguerel, presidenta da l'uniun da la magistraglia grischuna ed a la testa dal comité cunter las iniziativas, dovri uss be ruaus. Ruaus per che la magistraglia, che saja dumandada cun il nov plan d'instrucziun 21, possia lavurar vi da quel. E quai en gremis dal fatg senza influenzas dal discurs politic.
Jau vom da quai anora che nus survegnin uss il ruaus ch'è necessari.
Tenor cusseglier guvernativ e schef dal departament d'educaziun partent, Martin Jäger, haja il suveran dà glisch verda ad els da lavurar vinavant uschia sco els lavuran. Ussa vegnia lavurà vinavant vi da l'introducziun dal nov plan d'instrucziun. Las scolas autas da pedagogia en l'entira Svizra scoleschian vinavant las scolastas ed ils scolasts. Ins stoppia lavurar vidlonder e na possia betg metter enturn tut ils buttuns d'in mument sin l'auter.
In svilup che sto vegnir franà
Da la vart dals iniziants è Marlies Klesse ferm persvasa ch'els hajan lantschà cun las duas iniziativas ina discussiun necessaria, malgrà il cler NA dal suveran. Uss guardia la glieud bler pli conscient sin quai che capita en las scolas. Ed ella speria che scolasts, geniturs u tat e tatta s'annunzian lura er sch'insatge giaja fallà.
Qua sto vegnir agì. Quai na pon ins betg laschar ir vinavant uschia.
Ed er uschiglio è Marlies Klesse da l'avis ch'i dettia ferms moviments ed ina discussiun animada er sin livel internaziunal encunter ils sistems da scola introducids ils ultims onns. Quai saja in svilup en la faussa direcziun ch'i saja da franar.
RR actualitad 06:00
