En il Grischun vivan tut ils requirents d'asil en chasas d'asil. Ils uffants survegnan là ina scolaziun en ina scola interna. En classas pitschnas duajan els emprender uschè spert sco pussaivel tudestg ed autras chaussas fundamentalas per esser preparads per la scola populara.
Critica da geniturs
Plirs geniturs han dentant formulà differenta critica envers il model da scola actual:
- La qualitad da l'instrucziun na saja betg buna: Ils scolasts laschan ils uffants persul cun ils cudeschs da matematica e tudestg senza gidar en il process d'emprender.
- Uffants visitan l'instrucziun sur onns senza ch'els vegnian tar il nivel da la scola populara.
- Ina pli svelta integraziun en la scola populara fiss d'avisar.
Reacziun da vart uffiziala
Il manader da l'uffizi da migraziun grischun, Marcel Suter refusa dentant las reproschas. Ils resuns da las vischnancas nua che uffants èn vegnids integrads en la scola populara sajan positivs. Plinavant dovra la preparaziun dad uffants sin la scola populara temp.
En egl croda che 90 uffants da fugitivs visitan per il mument ina scola interna en il Grischun, pli che la mesadad dad els gia passa dus onns. En la scola populara èn actualmain dentant mo 9 uffants da fugitivs integrads.
RR actualitad 12:00