Diesch vischnancas en il chantun Grischun han ina scola bilingua. Da quai vegn instruì en nov scolas rumantsch–tudestg ed en duas talian–tudestg.
Tar las scolas bilinguas vegn differenzià tranter duas differentas furmas:
Instrucziun cun differentas cumparts da la lingua
L'emprima furma è vegnida introducida il 1996 sco test a Samedan. Motiv per questa introducziun era che blers territoris rumantschs ch'eran ferm germanisads èn vegnids sut squitsch. Per evitar che la scola tradiziunala rumantscha sa midia en ina scola tradiziunala tudestga – è vegnì chattà ina schliaziun da cumpromiss.
En questa furma d'instrucziun han ils scolars per il pli dapli rumantsch en las emprimas classas, e silsuenter dapli tudestg. Questa furma d'instrucziun bilingua vegn duvrada en las scolas da Samedan, Puntraschigna, Bever, La Punt Chamues-ch, Schlarigna, Segl e Trin.
Instrucziun cun medemas cumparts da la lingua
La segunda furma da las scolas bilinguas è vegnida introducida l'onn 2000 a Cuira. Quella furma vegn cunzunt avant en regiuns tudestgas, nua ch'ins vul promover u dar dapli preschientscha al rumantsch u talian. En questas scolas vegnan las duas linguas instruidas en la medema qualitad e quantitad. Las scolas ch'enconuschan quest sistem èn: Cuira, Glion, Domat e Malögia.