Scolas bilinguas – studi mussa bunas cumpetenzas en rumantsch

Ina scola bilingua rumantsch-tudestga maina mo a pitschens mancos tar la cumpetenza da rumantsch. Quai mussa in studi da la Scola auta da pedagogia dal Grischun.

Il maun d'in uffant che fa pensums Bild in Lightbox öffnen.

Legenda da maletgs: D’in model da success cun la scola bilingua discurra il studi. Keystone

Cun paucas excepziuns sajan ils scolars e las scolaras da las scolas bilinguas examinadas mo pauc pli flaivels che las classas da referenza che han servì per cumparegliar. Quai mussian ils resultats dal studi fatg sur plirs onns en scolas bilinguas da l‘Engiadin’Ota, scriva il responsabel per il studi Manfred Gross.

Il studi mussa era che scolaras e scolars en scolas bilinguas han almain las medemas cumpetenzas en lingua tudestga, sco scolars e scolaras en scolas tudestgas. Ed era en matematica na dettia quai nagins deficits, en cumparegliaziun cun scolas cun sulet ina lingua d’instrucziun.

Il studi ha la Scola auta da pedagogia dal Grischun fatg per incumbensa da las scolas bilinguas da l’Engiadin’Ota a Bever, Schlarigna, Samedan e Puntraschigna. Las evaluaziuns en ils roms rumantsch, matematica e tudestg han ins fatg ils onns 2013 fin 2017.

RR novitads 12:00