La presidenta dal Cussegl grond è sa drizzada cun in appel a deputadas e deputads: Persunas cun problems psichics sajan d'integrar en la societad e betg d'isolar.
Malsognas psichicas pon tutgar nus tuts.
Surtut depressiuns tutgian tar las malsognas che vegnian sut-valitadas il pli savens. Dentant tut las malsognas psichicas hajan in'influenza sin la qualitad da vita, il mintgadi e l'abilitad da lavurar. Igl è stà l'emprim pled d'avertura da la socialdemocrata da Cuira, ch'è vegnida elegida l'avust sco pli auta grischuna.
En il center da la sessiun stattan duas leschas:
Introducir scolas medias d'informatica?
La sessiun cumenza cun in tema che dat adina puspè da discutar: La regenza grischuna vul mantegnair las scolas medias ora en las regiuns, malgrà ch'ellas han adina pli paucs scolars. Las novas cundiziuns vegnan fixadas en la lescha davart las scolas medias.
In punct central è la dumonda sch'il Grischun duai porscher scolas medias d’informatica. Gia l'october 2014 è questa dumonda vegnida discutada, lura han deputadas e deputads votà piz a cup encunter – numnadamain cun la vusch da tagl dal president dal Cussegl grond da lezzas uras, Duri Campell (PBD).
Gulivar avantatgs e dischavantatgs da midadas da zona
En il center da l'autra revisiun – quella davart la planisaziun dal territori – stat la finamira da reducir zonas da bajegiar. Per far quai vegn introducì per l’ina ina gulivaziun tranter possessurs che perdan e tals che profiteschan. Per l'autra duai dar ina gulivaziun tranter las vischnancas. Plinavant vegnan fixadas mesiras per evitar che terren da bajegiar resta vid e na vegn betg surbajegià.
La sessiun d'october dura da glindesdi suentermezdi enfin gievgia. Per l'emprima giada porscha il chantun in livestream ord la sala dal Cussegl grond.
RR actualitad 12.00
