Er la gronda part da las ulteriuras scolas medias dal chantun sentan la digren da scolaras e scolars. Uschia per exempel era las scolas medias en l’Engiadina.
Surtut l'Institut Otalpin a Ftan ha da cumbatter gia dapi onns cun las consequenzas dal svilup demografic. Cun la restructuraziun da la purschida saja reussì da render puspè attractiva la scola era en la regiun, di il directur Beat Sommer.
Tuttina cumenzan be 8 scolaras e scolars l’emprima classa dal progimnasi – en cumparegliaziun cun l’onn avant è quai dentant gia in augment, di Sommer.
Las scolas medias a Zuoz e Samedan han registrà per l’onn actual quasi tuttina blers scolars sco ils onns avant. Uschia cumenzan a Samedan 19 scolaras e scolars il gimnasi ed a Zuoz 18.
In zic different vesa la situaziun ora a la scola media evangelica a Schiers. Perquai ch’il viadi ord la Vallada dal Rain grischuna ed ord la chapitala n’è betg lunsch, profitescha la scola d’in augment da scolaras e scolars.
Uschia saja quai pussaivel quest onn da furmar cun 63 scolaras e scolars trais emprimas classas, di il directur Hans-Andrea Tarnutzer. Ord da la regiun dal Partenz saja dentant la digren da la populaziun er da sentir a Schiers, accentuescha Tarnutzer.
RR actualitad 07:00