Siglir tar il cuntegn

Header

video
Discussiun davart schluccar il scumond da fimar
Or da Telesguard dals 01.09.2016.
laschar ir. Durada: 2 minutas 18 Secundas.
cuntegn

Chantun Scumond da fimar na vegn betg schluccà

Il Cussegl grond ha decidì cun 96 tar 15 vuschs da restar tar il scumond da fimar. I na duai betg dar locals nua ch'i è lubì da fimar. Suenter lunga discussiun è la revisiun totala da la lescha da sanadad vegnida decidida.

La dumonda era simpla: Duai il scumond da fimar restar sco enfin uss u duain locals per fimaders vegnir lubids?

Tals locals dastgassan dentant be avair ina surfatscha maximala da 80m2, stuessan avair ina buna ventilaziun ed il persunal da service stuess avair suttascrit ch'els èn pronts da lavurar en in tal local. Ins stoppia laschar liber als ustiers la decisiun sch'els vulan laschar fimar lur osps u na. Sper quai saja quai be ina pitschna midada da la lescha.

Nagina schanza per aderents

Tuttina ha la proposta dals aderents da tals locals gì nagina schanza tar ils deputads. Fitg cler cun 96 tar 15 vuschs han els decidì da restar tar la lescha actuala.

Ils arguments da betg turnar enavos tar ils temps avant il scumond da fimar e ch'il suveran ha decidì avant otg onns cun 75% da las vuschs in tal scumond han persvadì dapli deputads.

Revisiun totala da la lescha da sanadad è decidida

Il Cussegl grond ha decidì cun 107 vuschs unanimamain la revisiun totala da la lescha da sanadad. Sper il punct dal scumond da fimar ha er il post da mediaziun per chasas da tgira procurà per discussiuns. Quai post è vegnì stritgà. La nova lescha duai ir en vigur l’entschatta dal 2017.

Artitgels legids il pli savens