La finamira da la collavuraziun pli stretga è da pudair mantegnair er en il futur il provediment da sanadad decentral. Quai tenor ina communicaziun da la regenza grischuna. Ultra da quai duai il provediment da sanadad er funcziunar economicamain meglier cun far la midada. Las sfidas en il sectur da sanadad pretendian in'uniun u almain ina collavuraziun dals purtaders da prestaziun e quai sin nivel operativ sco er strategic.
Impuls finanzials per furmar unic purtader
Ils ospitals (excepziun Ospital chantunal dal Grischun), las chasas da persunas attempadas e da tgira ed ils servetschs da spitex han ina grondezza da manaschi memia pitschna per pudair vegnir a frida a moda effizienta cun las cundiziuns che daventan pli e pli severas en ils fatgs da sanadad.
La fusiun sco er la collavuraziun pli intensiva dals furniturs da prestaziuns duain perquai vegnir promovidas dal chantun cun impuls finanzials. Tut en tut metta il chantun a disposiziun 5 milliuns francs.
Tractà en sessiun d'avust
La regenza ha deliberà la missiva per mauns dal Cussegl grond. Lez s'occupa lura en la sessiun d'avust cun la revisiun parziala da la lescha per promover la tgira da malsauns.
