Il directur da sanadad dal chantun Grischun, Peter Peyer, ha persequità il svilup dal coronavirus cun inqual fauda sin il frunt. Perquai fa el l'appel cler, ch’i na saja betg a fin. Cunquai che las persunas viageschan pli savens e las reglas d’igiena vegnan betg pli resguardadas uschè bain, dettia pli blers infectads. E quai saja schlet, per il turissem, per la gastronomia e per il sistem da sanadad.
La regenza grischuna spetga
Ma per il mument prenda la regenza naginas mesiras. Era betg per exempel en clubs e bars. Che la distanza e las reglas d’igiena vegnan resguardas, per quai sajan quels sezs responsabels. In pli grond problem vesa Peter Peyer sin las vias, nua che nagin ha glistas da persunas.
Là pon ins sulet appellar a la responsabladad da las persunas.
Sche quai na saja betg il cas, lura stoppian las vischnancas reagir e limitar il dumber da persunas. Quai per evitar massas da persunas sin via sco ins ha vis la davosa fin d’emna a Cuira.
Il chantun da sia vart è tenor il directur da sanadad intensivamain vidlonder da planisar ed organisar, per esser pront sch’i dat ina segunda unda dal virus en Svizra ed en il Grischun.
