Da quel temp faschain nus las reservaziuns per las vacanzas da stad. Quest onn è quai uschè da dir crudà ora.
Atgnamain avessan ils biros da viadi uss stagiun auta. Da l'entschatta da l'onn enfin la fin mars avessan quels da cudeschar las vacanzas da stad per la clientella. Ma ina giada dapli lascha corona salidar. RTR ha dumandà trais biros da viadi e tar tuts èsi d'udir il medem: Il mument saja fitg ruassaivel e strusch insatgi empostia vacanzas. La raschun vesan ils biros da viadi en la malsegirezza da planisar en consequenza da la pandemia.
Il dumber da reservaziuns è fitg modest sche betg inexistent. Pertge anc adina na datti nagina segirtad da planisar.
Sulettamain empustaziuns spontanas
Il mument hajan ils biros anc intginas singulas empustaziuns a curta vista sin maisa. Ed a tgi ch'empostia uss vacanzas na emportia quai betg nua ch'il viadi mainia. La glieud veglia simplamain ir davent, per regla sper la mar, declera Andrea Engel, possessur da Engel Reisen.
Uss n'empostia strusch insatgi vacanzas per la stad u per l'atun. Da principi fiss quai però pussibel, declera Nicole Giger che maina il biro da viadi Viva Ferien a San Murezzan.
Atgnamain pon ins empustar gia uss vacanzas da stad. En general èn ils organisaturs culants tge che pertutga ils custs d'annullaziun.
Uschia possian ins empustar uss e lura guardar a curta vista sche quai è propi pussibel. Uschiglio possian ins annullar u spustar il viadi. Per la maioritad da la clientella na para quai però betg d'esser ina opziun. La stad è anc memia lunsch davent. La segirtad da planisar dependia da memia blers facturs: d'ina vart da la glista da pajais da ristg che l'Uffizi federal da sanadad actualisescha cuntinuadamain e da l'autra vart da las reglas da corona en il pajais nua ch'ins fa il viadi.
Dapli infurmaziuns da vart uffiziala
Perspectivas intschertas
Ils trais biros da viadis che RTR ha dumandà n'han anc betg pers la speranza da almain cudeschar intginas vacanzas da stad. Il possessur da Engel Reisen, Andrea Engel è pli sceptic. La stad saja quai forsa pussibel da porscher vacanzas aifer l'Europa, ma da far viadis pli lunsch en il lontan restia enfin la fin da l'onn grev. Petra Cahannes, manadra dal biro Capricorn a Glion pensa ch'i dat vacanzas da stad pli spontanas ed ella è persvasa che la glieud emposta vacanzas uschespert che quai è puspè pussibel dad ir en vacanzas. E Nicole Giger dal biro da viadi Viva Ferien a San Murezzan è optimistica da far intginas fatschentas gia la stad e che tut marscha puspè sin l'atun.
