Siglir tar il cuntegn

Header

audio
Il Mesauc pretenda dapli sustegn da la regenza grischuna
Or da Actualitad dals 07.04.2020.
laschar ir. Durada: 04:19 minutas.
cuntegn

Serrar plazzals? Naginas mesiras pli severas per il Mesauc

Ensemen cun passa 2'400 persunas sustegn er la deputada dal Cussegl grond e presidenta da San Vittore, Nicoletta Noi-Togni, ina petiziun online che pretenda per il Mesauc las medemas mesiras en il cumbat cunter il coronavirus sco en il chantun Tessin. Regenza e stab da crisa vesan quai però auter.

Gia dapi sis emnas pretenia ella las medemas mesiras per il Mesauc sco per il chantun vischin, uschia Nicoletta Noi-Togni. Ma fin uss èn las mesiras pli pauc severas. Cun serrar scolas e stizuns en l'entira Svizra saja il problem bain vegnì pli pitschen. Però vi da la differenza tenor ella la pli impurtanta n'haja midà nagut. Per la deputada dal Cussegl grond e presidenta communala è la pretensiun essenziala che plazzals e firmas vegnian serradas cumplettamain sco en il chantun Tessin.

L'argument principal è per Nicoletta Noi-Togni ch'i saja da far tut il pussaivel per sustegnair il Tessin en il cumbat cunter il virus. Perquai ch'ils mesolcins giajan en il Tessin tar il medi u en l'ospital e betg en il Grischun.

Ultra da quai vegnian fatschentas che na dastgian per il mument betg lavurar en il Tessin sur cunfin a lavurar en il Mesauc. Quai haja ella sco conferma en scrit da la polizia.

Schliaziun preferida: «fanestra da crisa»

Nicoletta Noi-Togni preferiss la schliaziun cun in'uschenumnada fanestra da crisa sco ils vischins tessinais hajan. Vul dir: la lubientscha da la Confederaziun per instradar mesiras u reglas pli seversas ch'il chantun u la Confederaziun.

Quai pretendan er passa 2'400 persunas che sustegnan sco la deputada dal Cussegl grond e presidenta communala ina petiziun online. Ma la gronda part dals presidents communals dal Mesauc, ed uschia er il stab da crisa regiunal, na vulan savair nagut da quai. Per ils blers è quai uss ch'il chantun Tessin ponderescha da schluccar plaunet las mesiras, gia memia tard. En quest senn ha er il president da la regenza grischuna, cusseglier guvernativ Christian Rathgeb, confermà ch'ins haja ponderà bain ina tala fanestra da crisa, ma ch'i na dettia acualmain nagina dumonda per ina tala.

Chantun argumentescha cun controllas e capacitads

Il chantun resta tar sia pratica da fin qua che plazzals e firmas vegnan be serradas sche las reglas da distanza ed igiena na vegnian betg respectadas. Areguard l'argument che firmas tessinaisas vegnian en il Mesauc a lavurar ha cusseglier guvernativ Peter Peyer ditg: Ins haja persequità quai pli exact e constatà che quai na saja gist en il Mesauc betg il cas. En la val Calanca haja dà singuls pitschens cas. E tar las controllas n'haja nagin plazzal stuì vegnir serrà.

Tar tut las 170 controllas ch'i haja dà dapi ils 28 da mars en l'entir chantun, haja dà be duas reclamaziuns.

Plinavant saja il chantun Grischun gist avant in'emna sa cunvegnì cun il chantun Tessin da sa gidar vicendaivlamain en il cas da basegns cun plazs d'ospital per tgira intensiva e persunas dal fatg. Las cifras actualas da las infecziuns mussian però tant per il Tessin sco per il Grischun ch'ins saja sin buna via, uschia Peter Peyer vinavant.

Nicoletta Noi-Togni resta tar si'opiniun ch'i duvrass las medemas mesiras en il Mesauc sco en il Tessin. Anc avant trais dis sajan ils ospitals tessinais tenor ella stads curt avant il collaps. E qua na saja quai betg responsabel da betg far tut il pussaivel, pia er serrar plazzals e firmas, per prevegnir a dapli infecziuns.

RTR actualitad 17:00

Artitgels legids il pli savens

Scrollar a sanestra Scrollar a dretga