Suenter quatter mais s'entaupa il Cussegl grond puspè – quai suenter la pausa sfurzada entras il coronavirus. Ils parlamentaris vegnan dentant betg a debattar sco usità en la chasa dal Cussegl grond, mabain en la halla da citad a Cuira. Qua è la distanza garantida. Per far ord ina halla ina sala per politisar hai dentant duvrà in pulit sforz.
Custs totals d'in mez milliun francs
La halla è vegnida drizzada en simpel, mo cun il necessari. Dentant era cun la distanza ch'i basegna. L'impurtant saja il cuntegn da las debattas e betg quai ordenturn, di Alessandro Della Vedova, president dal Cussegl grond.
Ina gronda sfida saja dentant stada l'entira tecnica. Responsabla per lezza è la firma «Informatica». La manadra da project, Gabriela Paulin declera ch'i hajan mo gì dus mais peda per preparar l'entira chista. La sfida saja stada ch'i na dat nagin'infrastructura tecnica en la halla da citad. Els hajan stuì installar tut sez.
Ils custs totals per questa sessiun extra muros èn tar radund in mez milliun francs. Quasi il dubel dad ina sessiun normala.
