Siglir tar il cuntegn

Chantun Sessiun «extra muros» ad Arosa cumenza

120 deputadas e deputads sa radunan ad Arosa. A partir da las 14:00 debattescha il Cussegl grond extra muros en il center da sport e congress d'Arosa e betg en il bajetg dal Cussegl Grond a Cuira.

Ils proxims dis debattescha il Cussegl grond en il center da sport e congress ad Arosa.
Legenda: Ils proxims dis debattescha il Cussegl grond en il center da sport e congress ad Arosa. RTR, O. Galmarini

Temas vegnan ad esser tranter auter: Il quint annual dal chantun 2014 ed en quai connex la politica da finanzas en general; ina lescha per la protecziun da la populaziun ed ina lescha per la protecziun civila. Plinavant vegn debattà davart la revisiun parziala da la lescha da vias ed in nov bajetg per requirents d'asil sin l'areal en il Meiersboden a l'ur da Cuira sin sulom da Churwalden.

Elecziuns presidialas

Durant la sessiun da stad elegia il parlament grischun dapi il 2003 mintgamai il president da la regenza Grischuna. Elegì vegn mintgamai il vicepresident. Quai è quest onn Christian Rathgeb. El aveva fatg en l'elecziun sco vicepresident in resultat fitg bun (102 da 105 vuschs). I vegn spetgà ch'el fetschia era en l'elecziun sco president in resultat sumegliant.

Biera cun...

Sper las activitads parlamentaras vegnan deputadas e deputads era anc a sa participar a differents arranschaments sportivs e culturals ad Arosa. Era da quels vegn RTR a rapportar – ed era da quels inscunters spezials ch’i po be dar ad sessiuns ordaifer dal «courant normal» dal Cussegl grond.… in biera cun?