Cura? Nua? Anc adina? Jau sun persvasa che quai na interessa betg be mai, u betg? La vita privata dad in politicher dat adina in pau colur a sia funcziun.
Quai che capita tranter ils umans è insatge dal pli interessant. Quant bler che mimica ed intunaziun dian ora.
Perquai l’emprim mia impressiun dad Andri Perl ed Jon Pult avant l’intervista.
Andri Perl
Tranter ils deputads segir in dals «hipsters». Egliers da corn, barba. Enfin tar l’intervista che jau hai gì cun el e ses meglier ami Jon Pult, n'hai jau anc mai vis el a rir. Mai. Gnanca in surrir. Jau hai schizunt udì dad ina u l’autra vart ch’el saja arrogant. Insaco na datti per mai betg persunas arrogantas. Sche, datti persunas malsegiras – senza vulair dir che Andri Perl saja malsegir. Ubain meglier ditg: Betg dapli che auters. Ma mintgatant eri difficil da ma metter avant Andri Perl sin ina tribuna a rappar (guarda video sutvart).
En mintga cas: Ins auda anc bler, sche il di è lung. Ed ils dis durant la sessiun èn lungs.
Jon Pult
Davent da l’entschatta ina impressiun segira, ma era modesta. Ina cumbinaziun fitg simpatica. Il problem: El candidescha per il Cussegl naziunal. Vul dir, el ha pers. E sch'jau vi u betg, jau al suttamet - sche era be subconscient - ch’el è uschia perquai ch’el candidescha. El sa quai, jau sai quai, nus tuts savain quai. El na discurra betg da surengiu, fa sgnoccas e po rir da sai. Jau pens be: Ma porca, sincer u betg? Jau stoss dir: Jau hai segir laschà influenzar. Quantas giadas hai jau udì: «Ti vegns a vesair, quels che candideschan, quels emprovan a tut pretsch da far ina buna apparientscha». Alura èsi gia capità, e ti has envers mintga candidat pregiudizis. Jau hai schizunt survegnì in commentari sin la fotografia sisum la pagina: «Qua vesas, tgi ch’è dominant...»
Avessas pensà quai, avant che ti has legì quai? Jau betg.
Ma vegnin tar l’intervista. Gea, els abitavan propi ensemen. Quatter onns.
Avais udì a rir l'Andri Perl? En mintga cas: Els fan ensemen politica. Els sesan gist in davos tschel. Els dorman schizunt en la medema stanza durant la sessiun.
Andri Perl na bitta betg be or da stanza il Jon Pult, mabain era mustgins. Las rollas eran gia durant il temp ch’els abitavan ensemen fixas.
Quai fiss: Andri Perl – il minister da la defensiun.
Mia impressiun suenter l’intervista:
Betg bler auter. Uss sa jau che Andri Perl posseda musculs da rir, ed jau crai che Jon Pult sa exact, tge ch’el fa.
