Ils purs grischuns han passentà ina stad plain malsegirezzas. Mintga di han els gì da valitar da nov, sch'els pon star vinavant sin l'alp. Il facit dal Plantahof è uschia plitost surprendent: La stagiun d'alp 2018 saja numnadamain stada ina buna stagiun. I dettia dentant grondas differenzas: Alps pli bassas han gì in grev temp – e singuls han gì da stgargiar pli baud. Alps pli ad aut hajan dentant pudì star pli ditg che uschiglio. Quai surtut pervi da la buna primavaira, che ha pussibilità da metter ad alp pli baud.
La sitgira ha tuttina consequenzas
Fertant che las alps ad aut han gì divers urizis questa stad – esi tar blers bains purils en las valladas stà fitg sitg. Uschia na saja – tenor il president da l'Uniun purila grischuna – creschì tant sco nagut durant che las vatgas èn stadas sin l'alp. E quai manca ussa. Las consequenzas sajan: cumprar vitiers fain u vender muvel. Per il mument saja la situaziun anc supportabla – bler pli ditg dentant betg pli.
Qua chattais tut davart la setgira en il Grischun.
TR Telesguard 17:40