Enfin ussa era Jeanne Calment da la Frantscha, la pli veglia dunna che ha vivì. Ella è morta il 1997 en la vegliadetgna da 122 onns e 164 dis. Tenor scienziads po l'uman cuntanscher ina vegliadetgna da maximal 125 onns. Il 1997 era l'aspectativa da viver en Svizra tar 79 onns, oz è ella tar passa 83 onns. L'aspectativa da viver crescha onn per onn.
Tge sche l'aspectativa da viver fiss tar 125 onns?
Georges T. Roos è perscrutader dal futur. El sa fatschenta adina puspè cun scenaris dal futur. Sche mintga carstgaun vegniss 125 onns, lura fiss la populaziun tenor Roos en in dischequiliber. La gronda part da la populaziun avess vargà la vegliadetgna da 65 onns. La politica fiss pia ina geriatria.
Per ch'i vegniss uschè lunsch, sto la medischina anc far intgins svilups. I stuess esser pussaivel da manipular gens uschia, che malsognas ertaivlas fissan curablas e la medischina stuess vegnir da regiuvinar cellas.
Tenor Georges T. Roos èsi pauc probabel ch'il carstgaun vegnia propi ina giada tar ina aspectativa da viver da 125 onns. E tuttina manegia el:
Jau sun persvadì, nossa aspectativa da viver vegn anc a s'augmentar fitg. Quai è in impurtant tema, da quel stuessan nus era s'occupar en Svizra pli intensivamain.
RTR actualitad 08:00