Las persunas, la citad da Cuira ed ils autos vesan ora sco giugarets. Il vent buffa sisum ils sgrattatschiels dal City West. Però, per l’um da 32 onns, Samuel Volery, n'è quai insumma nagin problem. Per el sajan quai «be» 80 meters, di el curt avant ir sin la slackline. La fascinaziun dal sportist extrem per ballantschar sur la corda è palpabla. Cura cha Samuel Volery discurra da sia passiun glischa el da sisum fin giudim.
Cun las slacklines èsi sco cun vin: Mintgina ston ins l'emprim sentir ed emprender d'enconuscher.
Gnervus n'è il slackliner ch'ha era divers records mundials betg. Dentant saja quai tuttina anc spezial da ballantschar tranter duas chasas, manegia el. Ensemen cun ses collega Ando fa el la show cun elements artistics en il rom da las festivitads da 5 onns center City West.
Questa fin d’emna chamina Samuel Volery anc diversas giadas sur tuts or. E tuttina na survegn el betg lungurus. El di ch'el nizzegia mintga mument, era tranter las shows, per chaminar sin la slackline.
RR actualitad 06:00