En l'emprim’etappa dal project Sinergia èsi stà planisà da far in parcadi, che duai lura en ina segund’etappa vegnir remplazzada cun ina garascha sutterana. La citad da Cuira ha dentant decis che la garascha stoppi vegnir fatga gia en l'emprim’etappa. Ed uss è il chantun vidlonder d’adattar il project cun agid d’in'expertisa - il budget da 69 milliuns francs per l'emprim’etappa na dastga betg vegnir surtratg, quel è vegnì confermà da la populaziun.
Claus versus Cavigelli – dus avis divergents
In criticher dall'emprim’ura è il deputà da la PLD da Cuira Bruno Claus. El è persvadì ch'il chantun avess stuì savair ch'i saja da far parcadis sutterans: «Mintg’interpresa da Cuira sa ch'igl è da far ina garascha sutterana sch'ins bajegia insatge, il chantun na po uss betg far uschè sco sch'el n'avess betg savì quai.»
Cusseglier guvernativ Mario Cavigelli sa defenda dentant cunter quella reproscha: «Igl è sta previs er da la vart da la citad da Cuira da far la garascha pir en la segund’etappa. Per nus è quai stà ina surpraisa, che la garascha stoppia uss gia vegnir realisada cun l'emprim’etappa».
La segunda votaziun decida
Per il criticher Bruno Claus èsi dentant clar, che la citad vul cun quai garantir ch'i detti insumma ina garascha, perquai che la segund’etappa è anc gnanc approvada dal pievel. Claus vesa schizunt nair per quella segunda votaziun. «Sch'jau guard sin las finanzas dal chantun dals proxims onns, na dun jau betg bunas schanzas a la segund’etappa da sinergia.» Auter Mario Cavigelli: el è persvadì ch'il pievel vegnia ad approvar er ina segund’ettapa cura ch’el vesia, tge ch’èn ils avantatgs da l'emprim’etappa realisada.
Bruno Claus spetga vess sin ch'il chantun preschenta las alternativas ord l'expertisa. Per el èn anc bleras dumondas avertas. L'expertisa duai vegnir preschentada en 3 fin 5 emnas.