Siglir tar il cuntegn

Header

cuntegn

Sinergia In gir tras Sinergia cun l'architect chantunal

Il 2012 ha il suveran grischun detg Gea ad in center per l’administraziun chantunala, il project Sinergia. 12 onns process da planisar e process politics, 3 onns temp da bajegiar. Fin dal mars 2020 less l’administraziun chantunala cumenzar a far midada. Nus avain dastgà far in gir tras il bajetg.

Sinergia sa chatta davos il bajetg da l’uffizi da traffic. Il bajetg ha otg auzadas, duas sutterranas e sis sur terra. Il plan orizontal ha la furma d’ina giraffa, in bajetg cun in center e trais differents bratschs. In bajetg da betun e metal, cun grondas fanestras.

Ultimas lavurs

Ils lavurers èn vid las ultimas lavurs internas. Amez la halla d’entrada dat la stgala a spirala da metal en egl. Ella collia las tschintg auzadas, è pendida si vi dal palantschieu e na tutga betg il palantschieu.

Biros averts

Tut las 14 partiziuns da l’administraziun chantunala han sche pussaivel biros averts. Clients e clientas na vegnan betg beneventadas en quests biros, mabain en stanzas da sesida sper la halla d’entrada. Questas stanzas èn travestgidas cun lain, i savura da schember.

Qua sentan ins immediat ch’ins è en il chantun grischun cun quest lain. E quai savura bain!
Autur: Markus Dünnerarchitect chantunal

La finamira dal bajetg Sinergia è da promover la collavuraziun, era tranter las differentas unitads, d’optimar process, nizzegiar la flexibilitad da las stanzas e duvrar pli pauc spazi ed uschia era ils custs da mantegniment.

Open Space ed inslas da ruaus

La gronda part dals biros èn biros averts, era ils schefs n’han nagin agen biro. Quai saja la furma da lavurar per l’avegnir, è Markus Dünner persvadì. En ils biros da muster han ils emploiads survegnì in’emprima impressiun, co che lur plazzas da lavur pudessan vesair ora. Inslas da quatter maisas u mo da duas, differentas mobiglias da metter davent urden che spartan il medem mument era la stanza. Gie schizunt boxas da vaider cun duas sutgas ed ina maisa, per discurs pli impurtants.

I dat bleras differentas plazzas da lavur. L’idea è ch’ins po eleger la plazza da lavur, tut tenor tge ch’ins fa gest il mument.
Autur: Markus Dünnerarchitect chantunal

Las 14 unitads da l’administraziun chantunala cumenzan fin mars a far midada en il nov bajetg Sinergia. Perquai datti natiralmain in plan. Fatg midada vegn da surengiu. Vul dir: l’emprim mida il departament da traffic, construcziun e selvicultura. El ha il biro en la 5avla auzada. Sco ultim vegn anc midà il labor che vegn en il plaunterren – quai succeda entschatta matg.

RR actualitad 07:00