Il sistem actual cun pajar taglia tenor stadi civil na correspundia betg a la realitad d’ozendi. Quai è stada l’argumentaziun dal deputà Lukas Horrer (PS, Cuira). Cun ina taglia individuala pajassan umens e dunnas taglia independent da lur stadi civil – pia sch’els èn maridads ubain vivan en concubinat. I ha dentant era dà vuschs criticas che han mess en dumonda tge ch’ina tala iniziativa dal chantun portia insumma en las discussiuns a Berna ed han numnà quai «politica da placebo».
Tema permanent a Berna
Sin livel naziunal vegn gia discutà dapi onns davart ina taglia individuala: Il 2016 ha il suveran refusà in’inizitiva da la PCD. Il Tribunal federal ha dentant annullà pli tard la votaziun, damai che la Confederaziun aveva publitgà faussas cifras.
Actualmain rimna in comité suttascripziuns per ina nova iniziativa, tranter auter cun l’anteriura cussegliera federala Ruth Metzler.