Siglir tar il cuntegn

Header

cuntegn

Sistem electoral GR Regenza na vul betg sa fixar sin duas opziuns

La regenza grischuna na vul betg sa fixar strictamain sin duas variantas pussaivlas per adattar il sistem d'eleger il Cussegl grond, sco pretendì en l'incumbensa da Bruno Claus da PLD.

L'incumbensa duai vegnir midada giu en quest senn ch'il sistem d'elecziun stoppia esser stabil, transparent, gist e confurm a la lescha. Cunzunt la diversitad geografica, culturala, economica, linguistica, sociala e confes­siunala stoppia vegnir garantida e represchentada dal Cussegl grond, scriva la regenza en ina resposta. Uschia sajan tuttas vias anc avertas enstagl da gia sa focussar sin dus models.

Decisiun dal Tribunal federal

Il settember 2017 avevan pliras persunas e partidas inoltrà recurs tar il Tribunal federal. Ils recurrents avevan crititgà che betg mintga vusch haja la madema valur cun il sistem da majorz en il chantun. La stad da quest onn aveva il Tribunal federal alura decis ch'il sistem n'è betg cumpatibel cun la constituziun en ils circuls Avras, Cuira, Engiadin'Ota, Glion, Razén, Tavau e Tschintg Vitgs.

Da principi dastgia era en il futur vegnir elegì cun il sistem da maiorz en il chantun. Quel haja dentant ses cunfins e funcziuna betg per circuls pitschens e gronds. En consequenza ha il Tribunal federal decis ch'il chantun sto adattar ses sistem. Ina midada duai dar sin las proximas elecziuns dal Cussegl grond l'onn 2022. Davart quella midada vegn dentant er il pievel ad astgar decir, cunquai ch'i dovra ina midada da la constituziun.

Ord l'Archiv:

video
Il Grischun sto adattar ses sistem electoral
Or da Telesguard dals 21.08.2019.
laschar ir. Durada: 3 minutas 39 Secundas.

RR novitads 11:00

Artitgels legids il pli savens