Reto Furter surpiglia da nov la direcziun da la famiglia da medias Südostschweiz. L'um da 49 onns daventa uschia successur da Martina Fehr che mida sco directura tar il Center da scolaziun da medias MAZ a Lucerna.
Sco manader da la gruppa Südostschweiz è Furter responsabel a partir dal mars 2020 per la direcziun strategica ed operativa da l'interpresa che cumpiglia las gasettas Südostschweiz Bündner Zeitung, Südostschweiz Glarner Nachrichten, Linth-Zeitung sco er Radio e TV Südostschweiz e las medias socialas.
Reto Furter ha studegià istorgia a l'Universitad da Berna e serrà giu il 2006 cun il doctorat. Dasper la lavur ha el absolvì dapi il 2005 diversas scolaziuns schurnalisticas. Dal 2011 fin 2015 è el stà manader dal ressort regiunal Grischun da la gasetta Südostschweiz. Sco commember da la schefredacziun ha el silsuenter surpiglià la responsabladad per il ressort Grischun per tut ils chanals da medias da la Südostschweiz.
RTR novitads 15:00
