Cun la relaschada dals dus redacturs da la Südostschweiz en la Chasa federala vegn era la cooperaziun cun la «AZ Medien» schliada. Quai ha il CEO da la Somedia, Andrea Masüger confermà envers il magazin online «Klein Report».
Actualmain ha la Somedia dus redacturs en la Chasa federala a Berna e la «AZ Medien» quatter. Ils cuntegns che quels produceschan pon vegnir duvrads tant da la Südostschweiz sco era da la «Aargauer Zeitung». Las duas plazzas che vegnan uss stritgadas fan part dal program da spargn che la Somedia aveva preschentà fin schaner. Lura aveva la chasa da medias communitgà da stritgar 600% da plazzas. Cun las duas plazzas a Berna èn stritgads 140% da plazzas.
Futur anc avert
Co la Somedia less rapportar en il futur davart temas surregiunals è tenor Andrea Masüger aunc avert. Ina varianta saja da producir sez quels cuntegns sin basa dals texts da l'agentura da novitads SDA. Sco el ha ditg vinavant al magazin «Klein Report».
RR novitads 17:00