Siglir tar il cuntegn
Inhalt

Chantun Spargnar aua è er en il Grischun in tema

Malgrà che noss chantun vala sco chantun cun bler'aua n'èsi betg evident ch'ins po avrir la spina e l'aua curra en abundanza.

Foto Lai da Tuma - la tgina dal Rain.
Legenda: La Svizra ha il cletg d'avair diversas tginas d'aua – sco per exempel quella dal Rain. RTR, Selina Chistell

142 liters aua dovra ina persuna en Svizra en media a di. Che quell'aua cula simplamain uschia ord la spina ni funtauna na saja dentant betg evident. Davart questa tema èsi vegnì discutà ad ina dieta a Cuira. La stad passada haja fatg attent che spargnar aua è er en Svizra ed en il Grischun in tema.

La mancanza n'è uss betg anc acuta

Malgrà che vischnancas hajan tschentà giu las funtaunas ed appellà als abitants da duvrar aua cun mesira saja la mancanza anc us betg acuta, quai ha ditg David Volken ch'è expert da clima. Quai pudessi dentant sa midar sin il pli tard cura ch'i na dat betg pli ils glatschers en Svizra. Sche quels na portian betg pli aua en las funtaunas lura dettia quai segir conflicts. Quai per exempel en l'agricultura. Uschia stopp'ins en Svizra en l'avegnir segir mirar pli fitg cura e per tge ch'i vegn duvrà aua.

Squitsch da l'exteriur sin la Svizra

La Svizra stoppia nua uschè svelt far quitads ch'ella stettia sin il sitg. Ma cun il temp pudess il squitsch politic crescher sin la Svizra ch'ha numerus flums, lais e funtaunas, uschia l'expert. Conflicts pervia d'aua datti gia oz – per exempel tranter l'Egipta e l'Etiopia. Tenor Volken pudessi adina dar dapli dispitas per «l'aur blau». Ins stoppia uss far cler a la populaziun ch'i na saja betg evident che l'aua vegnia or da la spina. La finamira duess esser ch'ins chatta soluziuns co reparter l'aua per evitar conflicts.

RR actualitad 12:00