Siglir tar il cuntegn
Inhalt

Chantun Spectrum ultra-lartg per il Grischun

Il departament per l'economia publica vul accelerar ina colliaziun d'internet dal spectrum ultra-lartg per il Grischun.

Legende: Video Regiuns duain survegnir internet pli svelt abspielen. Laufzeit 03:02 Minuten.
Or da Telesguard dals 25.04.2018.

Il Grischun duai daventar in dals chantuns svizzers cun il meglier provediment d'internet. Per cuntanscher quai collavura il departament per economia e fatgs socials ensemen cun experts vi d'in concept da basa. Quel cuntegna propostas per meglierar il provediment d'internet svelt en las regiuns. Il focus è cler: surtut las interpresas pitschnas e mesaunas duessan profitar d'internet dal spectrum ultra-lartg. En in proxim pass sclerescha ina gruppa d'experts, en tge territoris ch'ins ha largias tar la colliaziun e co ch'ins po eliminar quellas.

Questas midadas en connex cun la rait sajan ina premissa essenziala per augmentar l'abilitad d'innovaziun da las interpresas pitschnas e mesaunas e dal turissem. Il grischun stoppia tegnair pitg a las regiuns metropolitanas da la Svizra.

Status actual

Per il mument è il grischun in pau sut la media Svizra en puncto rait mobila. Uschia il studi da la HTW. Sin bunamain tut las sveltezzas da l'internet tegna il Grischun pass. Mo tar la pli sperta categoria (pli che 100mbit/s) è il Grischun en retard. Tenor il studi da la HTW è il Grischun bunamain 20% sut la media svizra.

Quai che pertutga la rait fixa è il Grischun però cumparegliabel.

Utilisar l'infrastructura existenta

En grondas parts dal chantun datti schon bindels da fibra da vaider. Quels tutgan dentant a fatschentas sco la viafier retica ni la Cabelcom. Ma era l'uffizi da construcziun bassa ha in'atgna lingia da fibra da vaider. Quellas vegnan dentant duvradas mo per agens basegns. Tenor Jon Erni, part da la gruppa d'experts ed iniziant da «Mia Engiadina», vulan els integrar quellas lingias en ina rait communabla.

RR actualitad 17:00