Quai correspundia a las directivas da l’Uffizi da sanadad federal che valian dapi l’emna passada, di Raffael Mark, manader dals indrizs da sport da Cuira. 15 meters quadrat surfatscha d’aua stoppia mintga persuna avair en in bogn cuvert.
Dus fitg gronds bassins
Ils bassins en l’Obere Au a Cuira sajan fitg gronds. Il bassin en il bogn cuvert haja plaz per 59 persunas tenor las novas directivas. Ed il bassin en il liber, che vegn cuvert durant la stagiun fraida, porschia spazi per 70 persunas. Fa ensemen 129 persunas.
Il guardiabogn surveglia che questas limitas na vegnian betg surpassadas, di Raffael Mark. Durant nudar na stoppian ins sa chapescha purtar nagina mascrina. Ma en las gardarobas u en l’entrada dal bogn saja da purtar mascrina. E la distanza da 1,5 meters saja da respectar dapertut en ils indrizs dals bogns da l’Obere Au.
Tgi che va gugent a nudar, ma vul evitar dad esser en ils bogns da Cuira cun passa 100 persunas, po consultar il ticketshop da l’Obere Au. Il ticketshop inditgescha quants visitaders che sa chattan en il bogn. Annunzias n’èn betg necessarias.
Pli sever puncto patinar sin glatsch
Cun sias patineras proceda la citad da Cuira a moda pli stricta e severa che cun ils bogns. La patinera al Quader na vegn quest onn gnanca preparada. A la patinera al Quader existia access liber uschia ch’i saja nunpussaivel da controllar il dumber da persunas sin il glatsch, scriva la citad da Cuira en sia communicaziun da l’emna passada.
Plinavant frequentian gist avant la stagiun da skis magari fin 500 persunas la patinera al Quader. Talas fullas na sa cumportian betg cun las mesiras cunter corona.
La patinera en il liber en l’Obere Au n’avra la citad da Cuira er betg per il mument. Sulet en la halla da glatsch pon ins ir cun patinas.
