Fin oz avantmezdi èsi da quintar cun grondas quantitads da plievgia en il Grischun. Cunzunt en la regiun da Cuira, en Surselva, en Tumleastga, en Scanvetg ed en il Partenz, sco er en il Grischun Central ed en la regiun da Tavau quinta Sabine Balmer dad SRF Meteo cun blera plievgia.
Total vegn quintà cun 40 fin 70 mm plievgia. Sch'ins cumpareglia quai: Tar la staziun da mesirar a Cuira dat quai per ordinari durant l'entir avust bun 100 mm plievgia. Localmain pon questas quantitads er chaschunar aua gronda en auals ed er tar bovas. Er en l'Engiadina ed en las Valladas dal sid plova quai, là na saja dentant betg da quintar cun schi blera plievgia.
I po schizunt dar naiv
Sper quai vegni er pli fraid, a Cuira èsi damaun marvegl da quintar cun 11 grads ed a Tavau ed Arosa cun 4 grads. Sur 2'000 meters sur mar poi er dar naiv. Sin ils pass dal Flüela, da l'Alvra u er sin il Güglia poi pia avair naiv damaun marvegl. Plievgia e naiv po quai anc dar fin damaun la saira, la fasa intensiva cuzza dentant fin damaun da mezdi. Davent da mesemna vegn quai lura puspè bel ed er pli chaud e sin la fin d'emna poi tenor Sabine Balmer puspè dar enturn 30 grads.