Siglir tar il cuntegn

Header

audio
Bunura: Quant impurtantas èn las vacanzas d'atur per il Grischun?
Or da Actualitad dals 03.10.2019.
abspielen. Laufzeit 03:44 Minuten.
cuntegn

Stagiun d'atun «Ins vuless prolungar la stagiun da stad»

La fin settember fin november va la cifra da pernottaziuns en Grischun aval. Quai na pon ins betg evitar, di il directur da Grischun Vacanzas. La mira saja dentant da prolungar la stagiun da stad.

Cun quai che las temperaturas èn tendenzialmain adina pli autas, pon ins er far pli ditg las activitads da stad – viandar u ir cun velo. Quai vulan ins era nizzegiar, manegia Martin Vincenz.

Per che quella idea vegnia er al success, na bastia dentant betg mo sch'ina fatschenta avria sias portas. Plirs stoppian lavurar londervi.

Ins sto savair ch'ins po ir en las ustarias, ch'ins po ir a cumprar en e ch'ins ha ils hotels per pernottar: Quai è il product da basa ch'ins sto avair.
Autur: Martin VincenzDirectur Grischun Vacanzas

Plinavant giavischass el er dapli occurrenzas durant l'atun. Durant la stad dettia ina massa occurenzas ch'attirian la glieud. Durant l'atun duvrassi dapliras.

L'atun en cifras

Personen-Box aufklappenPersonen-Box zuklappen

Il Grischun ha l'onn passà gì bunamain 5,1 milliuns pernottaziuns – en media 430'000 al mais. Quai mussa in sguard en las cifras da l'Uffizi federal da statistica.

L'october vegnan registradas enturn 290'000 pernottaziuns. Quel mais n'è betg il pli schlet. Durant la primavaira è quella cifra per regla anc pli bassa. En congual cun la stad (594'000 il fanadur) e l'enviern (760'000 il favrer) è quai relativ pauc.

Quellas cifras èn durant ils ultims diesch onns creschidas, dentant betg propi marcantamain.

Betg avunda impuls

Ils ultims diesch onns n'ha l'atun betg attratg dapli turists – en congual cun la stagiun d'enviern e da stad. Tenor il directur da Grischun Vacanzas hajan ins adina puspè empruvà da dar impuls per far vegnir pli attractiv l'atun. Igl haja dentant dà quels ch'hajan ditg che quai na bastia betg per els.

Martin Vincenz è dentant persvadì, ch'ins vul augmentar en tut las regiuns il turissem d'atun:

Cun in mais e mez la stad e dus mais e mez l'enviern, n'hai jau betg l'idea ch'ins po far la svieuta ch'ins sto avair.
Autur: Martin VincenzDirectur da Grischun Vacanzas

Tge che na funcziuna tenor Martin Vincenz betg, è dad avair l'entir onn frequenzas autas. Las stagiuns lateralas dovran ins er per far reparaturas u simplamain per far pausa.

RR actualitad 07:00