Ils peschs ed era las auas en il chantun Grischun èn sut squitsch. Quai pervia dal clima, pervia da bovas e malauras ma er pervi dal niz da l'aua entras ovras idraulicas u pesticids en lais e flums. Per proteger ils animals e las auas haja quai duvrà novas prescripziuns per la pestga, di Adrian Arquint, manader da l'Uffizi chantunal da chatscha e pestga. Quellas valan a partir dal prim da favrer cun il cumenzament da la pestga en tscherts flums.
Be pli 60 peschs ad onn
Tranter auter è il dumber da peschs che mintgina e mintgin dastga pestgar limità sin 60. Plinavant è il chantun pli strict en chaussas mesiras da peschs. Uschia datti prescripziuns, tut tenor auas, quant grond ch'il pesch sto esser. Er peschs pli gronds da passa 34 cm ston ins puspè laschar ir. L'idea saja uschia ch'ils peschs gronds cun bun material genetic possian sa multiplitgar, declera Adrian Arquint.
Restricziuns ma er cumpromiss
Sper restricziuns è il chantun er vegnì encunter a pestgadras e pestgaders. Uschia datti nagins temps da protecziun pli, plinavant han ins prolungà il temp da pestga. En tscherts flums (p.ex. Rain enfin a Glion) cumenzà la pestga gia il prim da favrer.
Er l'Uniun chantunala da pestga è stada involvida en il process d'adattaziun. Radi Hofstetter il president da l'Uniun è cuntent cun la gronda part da las midadas. I saja stà uras da reveder las prescripziuns per proteger ils peschs. Tge che disturba dentant Hofstetter è che la pestga daventa pli cumplitgada. Uschia stoppian ils pestgaders esser pli precauts cun las mesiras dals peschs.
RR actualitad 17:00
