Bleras chombras d'hotel, abitaziuns da vacanzas, plazzas sin il campadi ed auters alloschis paran d'esser reservadas.
La situaziun da cudeschaziuns en Grischun per il temp da stad – surtut fanadur ed avust – è per gronda part buna fin fitg buna.
Intginas regiuns sajan sin il stan da l'onn passà. Autras hajan perfin dapli reservaziuns che l'onn avant.
Ina gronda part dals giasts èn da la Svizra. Ina retschertga da la «SonntagsZeitung» mussa, ch'il Grischun saja popular tar ils turists svizzers. Tranter las tschintg destinaziuns cun ils pli blers giasts svizzers sajan quatter destinaziuns grischunas.
Grond chantun, blera plazza
Luzi Bürkli na tema il mument betg ch'i dat hotspots, lieus cun memia bleras persunas. Il chantun Grischun saja grond, i dettia avunda plazza per sa reparter. La situaziun possia dentant esser en singuls lieus in pau autra. Sch'i haja memia blers giasts saja adina ina dumonda da l'optica.