24 uras al di service en chombra, la limousina stat adina pronta, il concierge ha adina buna luna. Tut quai tutga bunamain tar in hotel da tschintg stailas. Quels servetschs ed il persunal sajan dentant chars.
Qua dovri in tschert dumber da giasts per cuvrir ils custs fix da quels servetschs.
Sco quai che Andreas Züllig ha ditg envers il schurnal regiunal da SRF derivian ina buna part dals osps che pretendian quels servetschs dals Stadis Unids, da l'Arabia Saudita, da la China u da l'India. Là en ins cunfins dentant anc serrads. Quels osps vegnian a mancar als hotels da luxus.
Seminaris sco fatschenta principala
Blers da quels osps han er il Grandhotel Steigenberger ubain l'Hotel Intercontinental a Tavau. Quels han entant tuts dus decidì da serrar sur stad. Tar l'hotel Intercontinental sajan surtut ils seminaris ch'han betg lieu in problem.
Nus essan da stad ferm dependent da meetings ed events e nus essan confruntads cun bleras annullaziuns.
Meetings ed events na sajan il mument betg sin la glista da prioritad da sia clientella.
Lavur curta en blers lieus
La gronda part dals hotels da tschintg stailas avran dentant lur portas per la stagiun da stad. Il Waldhaus a Flem per exempel di sin dumonda, ch'els hajan insumma blers giasts da la Svizra. Pli pauc seminaris hajan dentant era els. La svieuta vegnia ad esser in pau pli bassa, di il pledader da medias sin dumonda.
Blers hotels han dentant annunzià lavur curta. Uschia er l'hotel da luxus da Richard Leuenberger a San Murezzan. La direcziun da l'hotel haja decidì da laschar avert l'hotel, ha ditg il directur. Uschia veglian els mussar ina tscherta cuntinuitad ed era per il persunal saja quella decisiun meglra.
Serrar fiss il pli grond donn.
Cun in grond gudogn na quinta il directur dentant betg.