Siglir tar il cuntegn

Chantun Stoffel duai avair 6,7 milliuns debits tar ses ex-partenari

Remo Stoffel duai avair 6,7 milliuns francs debits tar ses ex-partenari da fatschenta Hannjörg Hereth. En il Principadi dal Liechtenstein datti in cumond da pajament cun vigur legala cunter l'interprendider d'immobiglias grischun. Quai rapporta la Handelszeitung.

Purtret da Remo Stoffel durant ina cunferenza da pressa.
Legenda: Stoffel refusa las renfatschas. Keystone

L'advocat da Hereth di che Stoffel refusia cun perseveranza da pajar la summa. Entant han Hereth e ses advocat inizià ina procedura d'execuziun cunter Stoffel. L'entschatta d'october ha la dretgira da Vaduz ingiantà las aczias da la fatschenta Mondial Partners Holding da Stoffel. La valur approximativa da las aczias giaschia tar 49'000 francs, uschia en il "Versteigerungsdelikt" ch'è publitgà.

Dretgira aveva refusà renfatschas

En ina communicaziun a scrit renviescha Remo Stoffel ad ina sentenzia d'ina dretgira da cumpromiss dal 2012. Quella aveva refusà lezza giada las pretensiuns da Hereth e lez aveva stuì indemnisar Stoffel extra-uffizial cun in milliun francs.

Sin fundament da questa decisiun n'haja Stoffel betg en senn dad anc ina giada sa profundar cun las renfatschas veglias inoltradas danovamain da Hereth, uschia il pledader da Stoffel. Sche Hereth craja da pudair far pretensiuns, duaja el far questas en Svizra, nua che la sedia da la firma sa chattia e na betg en il Principadi da Liechtenstein.

RR novitads 16:00