Siglir tar il cuntegn

Chantun Strusch sustegn per iniziativa dubla da scola

Las duas iniziativas dal pievel grischunas, «Buna scola grischuna - cundecisiun en dumondas impurtantas» e «Buna scola grischuna - cundecisiun tar ils plans d'instrucziun» chattan strusch sustegn en la cumissiun per furmaziun dal Cussegl grond.

Ina stanza da scola cun scolars.
Legenda: Ina stanza da scola cun scolars. Keystone

La cumissiun per furmaziun e cultura recumonda al Cussegl grond da refusar las duas iniziativas, quai cun ina cuntravusch. Ed ella na fa er betg ina cuntraproposta. Las iniziativas avessan per consequenza, che las cumpetenzas da decider vegnissan spustadas da la regenza al Cussegl grond e la finala als votants ed a las votantas.

Tenor la cumissiun fiss quai fauss, perquai che fatgs classicamain operativs sco plans d’instrucziun na duai betg il Cussegl grond tractar. Quel haja sco organ strategic da procurar per las leschas e betg per realisar quellas.

Era ha la cumissiun vesì resalvas areguard la praticabilitad. Sch'il Cussegl grond e la cumissiun responsabla stuessan tractar e deliberar in plan d'instrucziun da pliras tschient paginas, na saja quai strusch da far sin ina moda e maniera seriusa.

Il Cussegl grond tracta la fatschenta en sia sessiun d'avust.

RR novitads 09:00