Siglir tar il cuntegn

Header

audio
Saira: Tgi succeda a Ladina Heimgartner? – Intervista cun Vincent Augustin
Or da Actualitad dals 29.10.2019.
laschar ir. Durada: 5 minutas 49 Secundas.
cuntegn

Successiun Ladina Heimgartner «Dunnas ed umens han schanzas»

La suprastanza da la SRG.R ed il president Vincent Augustin ston chattar ina successiun per la directura da RTR Ladina Heimgartner. Els fan la schelta tranter las candidatas ed ils candidats. La decisiun definitiva vegn dentant prendida a Berna. Tar la schelta gioga era la quota da dunnas ina rolla.

Schebain ch’igl era cler per Vincent Augustin, che Ladina Heimgartner na restia betg enfin la pensiun directura da RTR, n’ha el betg quintà gist uss cun la demissiun. El chapeschia dentant, ch’ina dunna da 40 onns veglia far ina midada.

L’entschatta è la surpraisa schon stada fitg gronda e l’emprim mument sun jau stà in zic trumpà.
Autur: Vincent Augustin president SRG.R

Per Vincent Augustin, ch’è dapi il cumenzament da l’onn en uffizi, munta la tschertga d’ina nova directura ubain d’in nov directur ina gronda sfida. Quai na vegnia tenor el betg ad esser lev.

Il profil da la successura u dal successur

Davart il profil da la nova persuna al timun da RTR vegnia la SRG.R a discutar venderdi en la proxima seduta da suprastanza. Ma ils chavazzins impurtants po Vincent Augustin gia tradir:

  • enconuschientscha da la scena mediala
  • pront per las midadas necessarias entras la digitalisaziun
  • abilitads da manar ina gronda interpresa
  • pronta ed abla da s’integrar en la direcziun generala da la SRG

Impurtant sajan tut davent da fermezzas en l’economia ed il management, las enconuschientschas medialas enfin tar las relaziuns en la Rumantschia. Schebain che la Rumantschia saja pitschna, hajan las davosas persunas al timun da RTR mussà, ch’i saja pussibel da chattar candidatas u candidats che possedan tut quellas abilitads.

La procedura d’elecziun

Sco proxim definescha la suprastanza da la SRG.R il profil che la nova directura u il nov directur duai avair. Lura vegn tschertgà candidatas e candidats che correspundan a quels criteris.

Entaifer quests candidats fa la SRG.R lura lur schelta ed inditgescha al cussegl d’administraziun da la SRG SSR a Berna ina enfin duas persunas che vegnan en dumonda. Quel prenda lura la decisiun definitiva.

RR actualitad 17:00

Artitgels legids il pli savens