Igl è stà ina sessiun en sasez disciplinada. Las deputadas ed ils deputads èn stads surprendentamain effizients – e quai malgrà ch'els han tractà grondas fatschentas. Els han tranter auter debattà da credits da corona, dal caos entaifer la dretgira chantunala, han dà in stausch da 40 milliuns francs a la digitalisaziun plus anc tractà in pugn plain dumondas. Durant las debattas èn els stads curts e concentrads. Schizunt cun discutar la dispita entaifer da la dretgira chantunala n'èn els betg sa laschads or sin la roma cun specular tge derschader che haja fatg tge sbagl, mabain han svelt tschertgà pussaivladads da far urden en il vesprer dretgira chantunala.
Elecziuns da dretgira na vegnan betg spustadas
In'emprima mesira da far urden fiss tenor la Partida socialdemocratica e la Partida populara stà, che las elecziuns dals derschaders vegnan spustadas da l'avust sin l'october. Uschia avessan las partidas gì dapli temp per chattar candidatas e candidats. Tgi vul numnadamain far urden pli radical e tgi main – entant che la PS e la PPS vulan il pli gugent barattar or tut ils derschaders na vul la PCD betg chastiar derschaders che n'hajan betg malduvrà lur uffizi. La conferenza da presidents ha dentant decidì, da betg spustar las elecziuns, ellas han lieu sco previs l'avust.
Main disciplinads èn ils deputads stads cun tegnair distanza, cun mintga pausa èn las troclas da deputadas e deputads avant la maschina da café vegnidas pli e pli spessas.
