Set pass grischuns èn mintg'onn serrads durant l'enviern. Il pass Alpsu è quel ch'avra puspè sco emprim suenter la serrada d'enviern, quai ils 27 d'avrigl a partir da las 08:00. Malgrà la massa naiv hajan els pudì lavurar e rumir bain ed ad ura il pass, uschia ha ditg Eugen Duff da l'Uffizi da construcziun bassa. Sin tut ils pass sajan lavurers e maschinas en acziun. Eugen Duff na quinta perquai betg cun retards. Ils pass avran uschia pli u main dal medem temp sco ils onns passads era.
Averturas planisads dals pass grischuns
Pass d'Alpsu | 27 d'avrigl, a las 08:00 uras |
Pass dal Spleia | 30 d'avrigl |
Pass dal S. Bernardino | 14 da matg |
Pass da l'Alvra | 21 da matg |
Pass da l'Umbrail | cumenzament da zercladur |
Forcola di Livigno | 7 da zercladur |
Pass dal Flüela | betg anc cler cura, pervia da la blera naiv |
Blera naiv sin divers pass
Pervia da l'enviern cun blera naiv, haja quai schon dà in zic dapli lavur. Cunzunt las bleras lavinas sin las vias dals pass chaschunian dapli lavur. Quellas portian numnadamain era material sco crappa e laina, che stoppia davent. Ultra da quai sajan ins er adina dependent da la lavur dals auters chantuns u er pajais – per realisar in'avertura a temp planisà.