Suenter il lockdown han ils museums grischuns gì per part dapli giasts che l'onn passà. Quai scriva il Bündner Tagblatt. Entant che blers gronds museums svizzers han stuì vegnir a frida 20 fin 80% damain visitaders, sa differenziescha la situaziun en il Grischun positiv – quai en parallela cun il sectur turistic. Dumbrà dapli visitaders han ils museums gronds a Cuira sco er ils pli pitschens en las valladas.
Pudì augmentar il pli ferm il dumber da visitaders ha tenor las cifras dal Bündner Taglblatt il Museum Regiunal Surselva. Il fanadur ed avust dal 2019 eran là vegnids dumbrads en tut 700 visitaders. Quest onn ha il museum dumbrà per quests dus mais 1562 visitaders.
D'attribuir sajan quellas autas cifras da visitaders als turists svizzers ch'han quest onn pervi dal coronavirus fatg vacanzas en Svizra. E cunzunt hajan blers giasts da la Romandia visità ils museums grischuns.
